21-OKTYABR — ÓZBEK TILI BAYRAMI KÚNI Qádirli watanlaslar! Húrmetli watanlaslar!
Bárinen burın, bársheńizdi 21-oktyabr — Ózbek tili bayramı kúni múnásibeti menen qızǵın qutlıqlayman!
Ana tili — millettiń biybaha baylıǵı, onıń tariyxı, mádeniyatı, mánawiyatı hám milliy ózligin kórsetiwshi muqaddes qádiriyat bolıp esaplanadı. Hár bir xalıqtıń ásirler dawamında qáliplesken úrp-ádetleri, dástúrleri hám ruwxıy miyrası, bárinen burın, onıń ana tilinde óz kórinisin tabadı.
1989-jılı 21-oktyabrde ózbek tiline mámleketlik til statusınıń beriliwi xalqımız turmısında áhmiyetli tariyxıy waqıya boldı. Bul sáne milliy qádiriyatlarımızdı qásterlep saqlaw, ana tilimizdiń jámiyetlik turmıstaǵı ornı hám abırayın jáne de bekkemlew jolındaǵı áhmiyetli qádem sıpatında tariyxqa mórlendi.
Búgingi kúnde mámleketimizde mámleketlik tildiń abırayın arttırıw, onıń barlıq tarawlarda keńnen qollanılıwın támiyinlew, bay ádebiy hám ruwxıy miyrasımızdı keleshek áwladlarǵa jetkeriw baǵdarında sistemalı jumıslar ámelge asırılmaqta.
Ásirese, kóp milletli Qaraqalpaqstan jerinde túrli millet hám xalıq wákilleriniń óz-ara tatıwlıq, doslıq hám awızbirshilikte jasawında tilge bolǵan húrmet, milliy qádiriyatlarǵa húrmet úlken áhmiyetke iye.
Tilge húrmet — milletke húrmet, ana tilin qádirlew bolsa Watanǵa bolǵan súyispenshiliktiń ayqın kórinisi bolıp esaplanadı.
Áziz watanlaslar!
Sizlerdi usı qutlı sáne — Ózbek tili bayramı kúni menen jáne bir márte shın kewlimnen qutlıqlayman.
Bársheńizge bekkem densawlıq, shańaraqlarıńızǵa tınıshlıq-paraxachılıq, qut-bereket, elimizdiń rawajlanıwı hám xalqımızdıń abadanlıǵı jolındaǵı jumısıńızda úlken tabıslar tileymen.
Ózbek tili bayramı kúni bárshemizge múbárek bolsın!
Húrmet penen,
Kamiljan Aytbaev Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı — Awıl xojalıǵı ministri
Кanallarımızǵa aǵza bolıw 👇 Telegram | Facebook | Instagram |Youtube
