RÁSMIY MÚNÁSIBET
“ANTIKORRUPCIYA” málimleme dereginen Qaraqalpaqstan Respublikasındaǵı “MAMATKARIM-SHARIFBOY” JShJ tárepinen “QIPSHAQ ǴÁLLE KLASTERI” JShJǵa jetkerip berilgen tógin ónimleri ushın tólemler menen baylanıslı qarızdarlıq júzege kelgenligi haqqında sın kózqarastaǵı material járiyalandı.
Usı jaǵday boyınsha sonı málim etemiz, óz-ara dúzilgen shártnama sheńberindegi esap-kitaplar, minnetlemeler hám qarızdarlıq máseleleri dáslep shártnama shártleri hám ámeldegi nızamshılıq talapları tiykarında sheshiliwi tiyis.
Usı múnásibet penen, eger redakciyada mazkur jaǵdaydı tastıyıqlawshı hújjetler bar bolsa, olardı belgilengen tártipte usınıw hám de qarızdarlıqtı óndiriw boyınsha isbilermenlik subyektine — qarızdarǵa rásmiy talapnama menen múrájat etiw usınıs etiledi.
Qarızdar tárepinen bul talapnama belgilengen múddette, yaǵnıy 5 kún ishinde orınlanbaǵan jaǵdayda, shártnama shártleri hám ámeldegi nızamshılıq talaplarına muwapıq qarızdarlıqtı óndiriw máselesi boyınsha ekonomikalıq sudqa múrájat etiw huqıqı bar.
Sonıń menen birge, Qaraqalpaqstan Respublikası Awıl xojalıǵı ministrligi xojalıq júrgiziwshi subyektler arasındaǵı shártnamalıq qatnasıqlara tiykarsız túrde aralaspaytuǵınlıǵın, tartıslı jaǵdaylar bolsa wákillikli uyımlar hám sud tárepinen nızamshılıqta belgilengen tártipte sheshiletuǵının málim etedi.
Ministrlik tárepinen óz wákilligi sheńberinde nızamshılıq talaplarına ámel etiliwi támiyinlenedi hám de awıl xojalıǵı tarawında jumıs alıp barıp atırǵan subyektlerdiń nızamlı huqıqları hám máplerin qorǵawǵa ayrıqsha itibar qaratıladı.
