Shımbay rayonında fermer xojalıqları basshıları menen ashıq sáwbetlesiw ótkerildi 📍 Búgin Shımbay rayonı hákimliginiń májilisler zalında Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı – Awıl xojalıǵı ministri Kamiljan Aytbaev hám de Ózagroinspekciyanıń Qaraqalpaqstan Respublikası basqarması baslıǵı Erpolat Qaypbergenovtıń qatnasıwında rayon fermer xojalıqları basshıları menen ushırasıw bolıp ótti. Ushırasıwda Shımbay rayonı hákimi N. Eshanov ta qatnastı. Sáwbetlesiw dawamında jumısında qıyınshılıqlarǵa dus kelip atırǵan, ónimdarlıǵı tómen, sonday-aq, finanslıq minnetlemelerin orınlawda mashqalaları bolǵan fermer xojalıqların qollap-quwatlaw máseleleri hár tárepleme dodalandı. Atap aytqanda, aldıńǵı tájiriybege iye, nátiyjeli jumıs alıp barıp atırǵan fermer xojalıqların mashqalalı xojalıqlarǵa biriktiriw hám de olar arasında «ustaz-shákirt» sistemasın jolǵa qoyıw usınısı alǵa súrildi. Bul sistema arqalı fermerlerge ámeliy kómek kórsetiw, agrotexnikalıq ilajlardı nátiyjeli shólkemlestiriw, ónimdarlıqtı arttırıw hám bar qarızdarlıqlardı basqıshpa-basqısh saplastırıwǵa erisiw máseleleri boyınsha pikir alısıldı. Sonday-aq, hár bir fermer xojalıǵı jumısın mánzilli úyreniw, bar mashqalalardı tallaw hám olardı ornında sheshiw boyınsha juwapker shólkemler aldında turǵan tiykarǵı wazıypalar belgilep alındı. Ushırasıw juwmaǵında fermer xojalıqların qollap-quwatlaw, olardıń ekonomikalıq turaqlılıǵın támiyinlew hám awıl xojalıǵı nátiyjeliligin arttırıwǵa qaratılǵan ilajlardı sistemalı ámelge asırıwdıń áhmiyetliligi atap ótildi.