Ózbekstan Respublikası Prezidentiniń 2025-jıl 14-fevraldaǵı PQ-57-sanlı qararınıń orınlanıwın támiyinlew sheńberinde “Beruniy Agro Star” JShJ tárepinen Qaraqalpaqstan Respublikasında sharwa ot-jemin jetistiriwdi rawajlandırıw, zamanagóy agrotexnologiyalardı engiziw hám jer resurslarınan nátiyjeli paydalanıw boyınsha sistemalı jumıslar alıp barılmaqta. Atap aytqanda, Shımbay rayonında elektron aukcion arqalı ajıratılǵan jer maydanlarında azıqlıq eginlerin jetistiriw jolǵa qoyılıp, suwǵarıw infrastrukturasın modernizaciyalaw jumısları dawam etpekte. Házirgi waqıtta Avstriyanıń “BAUER” kompaniyası tárepinen islep shıǵarılǵan zamanagóy pivot suwǵarıw sistemaların ornatıw jumısları basqıshpa-basqısh ámelge asırılmaqta. Bul texnologiyalardı engiziw nátiyjesinde suwdıń jumsalıwın 40 procentke shekem, janılǵınıń jumsalıwın 30 procentke shekem qısqartıw, qol miynetin 90 procentke shekem azaytıw hám eginlerdiń ónimdarlıǵın 20 procentke arttırıw imkaniyatı jaratıladı. Bul joybarlar aymaqta sharwashılıq ushın sapalı ot-jem bazasın bekkemlew, suw resurslarınan aqılǵa uǵras paydalanıw hám awıl xojalıǵında zamanagóy texnologiyalardı keńnen engiziwge xızmet etpekte. ==========
