Xojelide topıraqtıń agroximiyalıq analizine arnalǵan seminar ótkerildi Xojeli rayonında topıraqtı agroximiyalıq analizden ótkeriwdiń áhmiyeti, sapalı hám qáwipsiz awıl xojalıǵı ónimlerin jetistiriw hámde azıq-awqat qáwipsizligin támiyinlewdegi ornına baǵıshlanǵan seminar shólkemlestirildi. Ilajǵa Qaraqalpaqstan Respublikası Agroximiyalıq analiz orayınıń qánigeleri, diyqan hám fermer xojalıqlarınıń wákilleri, baǵmanlar hámde qıytaq jer iyeleri qatnastı. Seminar dawamında topıraqtıń quramı, azıqlıq zatlar menen támiyinlengenlik dárejesi hám ónimdarlıǵın anıqlaw, eginlerdi jerdiń agroximiyalıq jaǵdayınan kelip shıǵıp jaylastırıw, sonıń menen birge, mineral tóginlerden ilimiy tiykarlanǵan muǵdarlarda paydalanıw máseleleri keńnen talqılandı. Qánigeler topıraqtıń agroximiyalıq analizi eginlerdiń azıqlıq zatlarǵa bolǵan mútájligin anıq belgilewge, mineral tóginlerdiń muǵdarınan artıq qollanılıwına jol qoymawǵa hám ónim quramında zıyanlı zatlardıń toplanıwınıń aldın alıwǵa xızmet etetuǵının atap ótti. Bul bolsa ekologiyalıq taza, sapalı hám tutınıw ushın qáwipsiz ónimler jetistiriwde úlken áhmiyetke iye. Ilaj sońında qatnasıwshılardıń sorawlarına tolıq juwap berilip, topıraqtıń jaǵdayın jaqsılaw, tóginlerden aqılǵa muwapıq paydalanıw hám qáwipsiz azıq-awqat ónimlerin jetistiriw boyınsha ámeliy usınıslar berildi.