Nókis rayonında PP-18-sanlı Pármannıń orınlanıwı úyrenildi
Oliy Majlis Nızamshılıq palatasınıń deputatları Nókis rayonında bolıp, Ózbekstan Respublikası Prezidentiniń 2025-jıl 3-fevraldaǵı PP-18-sanlı Pármanınıń orınlanıwı boyınsha úyreniw jumısların alıp bardı.
Úyreniwlerde Oliy Majlis Nızamshılıq palatasınıń Agrar hám suw xojalıǵı máseleleri komitetiniń aǵzaları, Ózbekstan Liberal-demokratiyalıq partiyası frakciyasınıń wákili Muqaddasxon Axmedova hám Oliy Majlis Nızamshılıq palatasınıń deputatı, “Adolat” social-demokratiyalıq partiyası frakciyasınıń aǵzası Nodira Rashidova qatnastı.
Sapar dawamında “E-auksion” elektron sawda platforması arqalı jer uchastkaların qolǵa kirgizip, diyqan xojalıǵı hám basqa da awıl xojalıǵı baǵdarlarında óz jumısın jolǵa qoyǵan isbilermenlik subektleriniń jumısları menen jaqınnan tanıstı.
Dáslep, Nókis rayonı Samanbay APJ aymaǵında jumıs alıp barıp atırǵan “Orazbay Damegul” JShJǵa barıldı. Kárxana tárepinen “E-auksion” elektron platforması arqalı 10 gektar jer maydanı qolǵa kirgizilgen bolıp, búgingi kúnde bul maydanlarda awıl xojalıǵı ónimleri, sonıń ishinde, másh jetistirilmekte. Deputatlar másh egilgen maydanlardı kózden ótkerip, óndiris procesi hám xojalıq jumısı menen tanıstı.
Bunnan soń, Arbashı APJ aymaǵındaǵı “Nawqanbaǵ Agro Eksport” JShJ jumısı úyrenildi. Bul kárxana basshısı tárepinen “E-auksion” platforması arqalı 23 gektar jer maydanı qolǵa kirgizilgen. Házirgi kúnde bul maydanlarda pomidor, qawın hám másh jetistirilip, awıl xojalıǵı ónimlerin islep shıǵarıw jolǵa qoyılǵan.
Sonday-aq, Baqanshaqlı APJ aymaǵında Rasul Seytnazarov tárepinen shólkemlestirilgen “Sren Agro Sanoat” JShJ jumısı menen tanıstı. Isbilermen elektron onlayn aukcion sawdaları arqalı 45 gektar jer maydanın qolǵa kirgizgen bolıp, búgingi kúnde sharwashılıqtı rawajlandırıw maqsetinde azıqlıq eginlerden jońıshqa jetistirmekte.
Úyreniwler dawamında xojalıq basshıları menen ashıqtan-ashıq sóylesiw ótkerilip, olardıń jumıs procesinde ushırasıp atırǵan mashqalaları, bar tosqınlıqlar hám usınısları tıńlandı.
Bul úyreniwlerden gózlengen tiykarǵı maqset — Pármannıń orınlanıwın támiyinlew, elektron onlayn aukcion arqalı jer maydanların qolǵa kirgizgen isbilermenlerdiń jumısın rawajlandırıw, jer resurslarınan nátiyjeli paydalanıw hám awıl xojalıǵında isbilermenlik baslamaların qollap-quwatlaw máselelerin úyreniwden ibarat.
Ushırasıwlar dawamında bildirilgen usınıs hám mashqalalardı tiyisli tártipte kórip shıǵıw hám olardı sheshiw boyınsha zárúr ilajlardı belgilew máselelerine itibar qaratıldı.
