Qaraqalpaqstan Respublikası Awıl xojalıǵı ministrliginde Ózbekstan Respublikası Konstituciyasınıń 33 jıllıǵı múnásibeti menen májilis bolıp ótti
Búgin Qaraqalpaqstan Respublikası Awıl xojalıǵı ministrliginde Ózbekstan Respublikası Konstituciyası qabıl etilgeniniń 33 jıllıǵı múnásibeti menen saltanatlı májilis ótkerildi. Ilajda ministrlik sisteması xızmetkerleri hám taraw belsendileri qatnastı.
Onda Konstituciyanıń elimizde demokratiyalıq principlerdi bekkemlew, insan huqıqları menen erkinliklerin támiyinlew, mámleketlik hám jámietlik turmısta ádillik hám nızam ústinligin qarar taptırıwdaǵı ornı hám áhmieti haqqında sóz boldı.
Májilis dawamında qatnasıwshılarǵa Konstituciyamızda belgilengen tiykarǵı qaǵıydalar, olardıń ámeliy turmısımızǵa engiziliwi, awıl xojalıǵı tarawında alıp barılıp atırǵan turaqlı reformalarǵa tásiri haqqında tolıq maǵlıwmatlar berildi.
Sonday-aq, zamanagóy agrar rawajlanıw, resurslardan aqılǵa uǵras paydalanıw, diyqan hám fermerlerdiń máplerin qorǵawdı kúsheytiw sıyaqlı baǵdarlarda Konstituciyada bekkemlengen nızamlı tiykarlar áhmietli faktor ekeni atap ótildi.
