Nókis rayonında zamanagóy dándi qayta islew úskenesi iske túsirildi

Nókis rayonı aymaǵındaǵı Dán hám salı ilimiy-izertlew birlespesi tárepinen awıl xojalıǵın bunnan bılay da rawajlandırıw, ásirese tuqımgershilik hám dán ónimleriniń sapasın jaqsılaw maqsetinde áhmiyetli joybar ámelge asırıldı. Qıtay mámleketinen 100 mıń AQSh dollar qarjı esabınan zamanagóy, joqarı nátiyjelilikke iye ásbap-úskene alıp kelindi.

Bul úskene saatına 5 tonna kólemdegi 20 túrdegi dán ónimlerin qayta islew imkaniyatına iye. Ol arqalı dándi shań hám aralaspalardan tazalaw, sortlarǵa ajıratıw, arnawlı dáriler menen qayta islew hám tayar ónimdi qadaqlaw jumısları avtomatlastırılǵan túrde ámelge asırıladı. Bul bolsa waqıttı únemlew, miynet ónimdarlıǵın arttırıw hám ónimniń sapasın jáne de jaqsılawǵa xızmet etedi.

Jańa texnologiyalardıń engiziliwi awıl xojalıǵı tarawında zamanagóy kózqaraslardı kúsheytiwge tiykar jaratadı. Ásirese, Nókis rayonında jetistirilip atırǵan dán hám salı ónimleriniń eksportqa qolaylılıǵınıń artıwı, olardıń bazarǵa qolaylı túrde qadaqlanıwı ayrıqsha áhmiyetke iye.Sonıń menen birge, tuqımlıq dánlerdi sapalı saylap alıw hám dárilew arqalı kelesi máwsimde ónimdarlıqtı jáne de arttırıw imkaniyatı tuwıladı.