Paxta teriw mashinaları mexanizatorları ushın oqıw seminarı dawam etpekte Qaraqalpaqstan Awıl xojalıǵı hám agrotexnologiyalar institutında Qaraqalpaqstan Respublikası Awıl xojalıǵı ministrliginiń baslaması menen paxta teriw mashinaları mexanizatorların tayarlaw hám olardıń qánigeligin arttırıwǵa baǵdarlanǵan 5 kúnlik oqıw seminarı dawam etpekte. Búgin, seminar shınıǵıwlarınıń tórtinshi kúninde, mexanizatorlarǵa paxta teriw máwsiminde miynet hám texnika qáwipsizligi qaǵıydalarına qatań ámel etiw, texnikalardan paydalanıwda abaylı bolıw hám de órt kelip shıǵıwınıń aldın alıw boyınsha zárúrli usınıslar berildi. Atap aytqanda, texnikanı iske qosıwdan aldın elektr sımların, janılǵı hám maylaw sistemaların tekseriw, janılǵınıń aǵıp ketiwine jol qoymaw, mashinanı turaqlı tazalap turıw, qızıp ketetuǵın bólimlerin qadaǵalaw hám de órt qáwipsizligi qurallarınan durıs paydalanıw máselelerine ayrıqsha itibar qaratıldı. Sonday-aq, shınıǵıwlar dawamında Túrkiyada islep shıǵarılǵan «Cansa» markalı paxta teriw mashinalarınıń dúzilisi, texnikalıq imkaniyatları, basqarılıwı, iske tayarlaw hám olardan nátiyjeli paydalanıw boyınsha teoriyalıq hám de ámeliy sabaqlar ótkerildi. Bunday ámeliy shınıǵıwlar mexanizatorlardıń bilim hám kónlikpelerin bekkemlewde, texnikalardan qáwipsiz hám nátiyjeli paydalanıwda hám de paxta jıyın-terimi máwsimin shólkemleskenlik penen ótkeriwde úlken áhmiyetke iye.