Ámiwdárya rayonında ǵálle egiw máwsimi boyınsha kórgizbeli seminar ótkerildi
Ámiwdárya rayonında 2027-jıl zúrááti ushın gúzgi masaqlı dán eginlerin egiw máwsimine tayarlıq jumısları sheńberinde Aq altın APJ aymaǵındaǵı “Yakupova Gawhar” fermer xojalıǵında da kórgizbeli seminar shólkemlestirildi.
Seminarǵa Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljan Aytbaev, Ózagroinspekciyanıń Qaraqalpaqstan Respublikası basqarmasınıń baslıǵı E.Qayıpbergenov. rayon hákimi S.Xojametov, taraw qánigeleri, fermer hám diyxan xojalıqlarınıń basshıları qatnastı.
Ilaj dawamında gúzgi biyday eginlerin optimal múddetlerde egiw, jerge sapalı islew beriw, tuqımdı durıs tańlaw hám egiw normalarına ámel etiw, sonday-aq, eginlerdiń dáslepki rawajlanıw dáwirinde agrotexnikalıq talaplar tiykarında tárbiyalaw máselelerine ayrıqsha itibar qaratıldı.
Seminar dawamında fermer xojalıǵında ǵálle egiw jumısları ámeliy jaqtan kórsetilip, joqarı hám sapalı zúráát jetistiriw ushın zamanagóy agrotexnologiyalardan nátiyjeli paydalanıw boyınsha usınıslar berildi.
Ilaj juwmaǵında ǵálle egiw máwsimin shólkemleskenlik penen, belgilengen agrotexnikalıq múddetlerde hám sapalı shólkemlestiriw boyınsha juwapkerlerge tiyisli tapsırmalar hám usınıslar berildi.
