Yaponyanıń Xalıqaralıq birge islesiw agentligi hámde Kyoto universiteti docentiniń usınısına tiykar Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı – awıl xojalıǵı ministri Sh.Teshayev penen JICA shólkeminiń Tashkent qalasındaǵı filialı qánigeleri menen ushırasıw bolıp ótti.
Ushırasıwǵa Qaraqalpaqstan awıl xojalıǵı hám agrotexnologiyalar institutı rektorı B.Jollıbekov, Qaraqalpaqstan Respublikası Awıl xojalıǵı ministriniń orınbasarı N.Kayupov, Qaraqalpaqstan Respublikası suw xojalıǵı ministriniń orınbasarı A.Orazımbetov hám de Yaponiyanıń xalıqaralıq birge islesiw agentliginiń Ekonomikalıq rawajlanıw bólimi direktorı Ban Daichi, JICA shólkeminiń Tashkent qalasındaǵı filialı bas qánigeleri Noguchi Akiko, Qurbonov Farxod, Satreps Blue joybarı kordinatorı Ishigaki Shigeki hám Yaponiyanıń Kyoto universiteti docenti Xujanazarov Temur qatnastı.
SATREPS bul – birgeliktegi xalıqaralıq izertlewlerdi rawajlandırıw ushın Yaponiya húkimetiniń baǵdarlaması bolıp bul baǵdarlamada Yaponiya ilim hám texnika agentligi, Yaponiya xalıqaralıq birge islesiw agentligi (JICA) hám mámleketimiz arasındaǵı birge islesiw sıpatında dúzilgen.Joybarda kórsetilgen mámleket talaplarınan kelip shıǵıp, baǵdarlama jergilikli hám globallıq jámiyetke ámeliy payda keltiretuǵın izertlewlerdiń jańa innovaciyalıq nátiyjelerin hám olardıń jetiskenliklerin engiziw arqalı global mashqalalardı sheshiwge qaratılǵan.
