Usı jıldıń 5-fevral kúni Xojeli rayonı Aybek massivinde jaylasqan ulıwma maydanı 5,5 gektardan ibarat “Nukus Agro Sitiy” JShJde kórgizbeli seminar shólkemlestirildi.Seminarǵa Agrosanaattı rawajlandırıw agentliginiń Qaraqalpaqstan Respublikası bólimi baslıǵı X.Achilov, Akademik M.Mirzaev atındaǵı baǵshılıq, júzimgershilik hám vinoshılıq ilimiy izertlew institutı Qaraqalpaq ilimiy tájiriybe stanciyası direktorınıń ilimiy isler hám innovaciyalar boyınsha orınbasarı U.Uzakbergenov, Agrosanaattı rawajlandırıw agentliginiń rayonlıq bas qánigeleri hám rayonlıq Ósimlikler karantini agentligi inspektorı hám baǵshılıq fermer xojalıǵı wákilleri qatnastı.
Seminarda, baǵshılıq tarawı qánigeleri hám fermerler qatnasıp, miyweli baǵlardı rawajlandırıw boyınsha áhmiyetli máseleler dodalandı.Ilaj dawamında baǵlarǵa agrotexnikalıq xızmet kórsetiw, tereklerge islew beriw, nállerdi durıs tárbiyalaw hám zúráátlilikti arttırıw boyınsha ilimiy tiykarlanǵan usınıslar berildi.
Seminardıń tiykarǵı baǵdarları:
• Baglarda agrotexnikalıq ilajlar: topıraq quramın jaqsılaw, suwǵarıw usılları hám tóginlew texnologiyaları boyınsha usınıslar.
• Tereklerge islew beriw hám kesiw: miyweli tereklerdiń vegetativ ósiwin támiyinlew hám ónimdarlıqtı arttırıw maqsetinde forma beriw usılları kórsetildi.
nállerlerdi tárbiyalaw: egiwden baslap, kesellik hám zıyankeslerge qarsı gúresiwge shekemgi basqıshlardı óz ishine aldı.
• Ónimdarlıqtı arttırıw: zamanagóy usıllar hám innovaciyalıq kózqaraslar arqalı miyweli baǵlardan joqarı ónim alıw imkaniyatları túsindirildi.
Seminar dawamında qatnasıwshılar ózleriniń qızıqtırǵan sorawlarǵa juwaplar aldı hám ámeliy sabaqlarda qatnasıp, tájiriybeli qánigelerden tikkeley úyreniw imkaniyatına iye boldı.Bunday ilajlar baǵshılıq fermer xojalıqları ushın úlken payda beretuǵını hám tarawdıń jáne de rawajlanıwına xızmet etetuǵını atap ótildi.
