#Turaqlı_keleshek_ushın
Paxtashılıqta innovaciyalıq qatnas
Ózbekstan awıl xojalıǵında paxtashılıq áhmiyetli orındı iyeleydi. Biraq, dástúriy paxta jetistiriw usılları suw resursların hádden tıs jumsaw, topıraq ónimdarlıǵın tómenletiw hám ekologiyalıq mashqalalardı keltirip shıǵarmaqta. Sol sebepli, zamanagóy agrotexnologiyalardı engiziw hám innovaciyalıq qatnaslardı qollanıw zárúrligi barǵan sayın artıp barmaqta.
Qaraqalpaqstan Respublikasında xızmet saparında bolıp turǵan Awıl xojalıǵı ministri Ibrohim Abdurahmonov hám Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshaev Ámiwdárya rayonındaǵı “Palwan awıl” fermer xojalıǵında ámelge asırılıp atırǵan jańasha agrotexnologiyalıq usıllar menen tanıstı. Bul xojalıqtaǵı 11 gektarlıq maydanda “Sultan” sortlı paxta 76×10 sxema tiykarında eki qatar tárizinde, tamshılatıp suwǵarıw sisteması arqalı plyonka astına egilgen.
Bul usıl suwdı únemlew menen birge, topıraqtıń ónimdarlıǵın saqlap qalıwda áhmiyetli faktor sıpatında bahalanbaqta. Bul innovaciyalıq qatnas paxtashılıqta bar mashqalalarǵa sheshim tabıwǵa qaratılǵan.
“Palwan awıl” fermer xojalıǵındaǵı tájiriybe sonı kórsetedi, innovaciyalıq qatnaslar paxtashılıqta ónimdarlıqtı arttırıw, suw resursların únemlew hám ekologiyalıq mashqalalardı azaytıwǵa járdem beredi. Bul tájiriybeni basqa xojalıqlarǵa da tarqatıw hám paxtashılıqta zamanagóy agrotexnologiyalardı engiziwdi xoshametlew úlken áhmiyetke iye.
Paxtashılıqta innovaciyalıq qatnaslardı qollanıp, biz suw resursların únemlew, topıraq ónimdarlıǵın saqlap qalıw hám ekologiyalıq mashqalalardı azaytıw arqalı turaqlı awıl xojalıǵın rawajlandırıwǵa úles qosıwımız múmkin.
