Fermerlerge zamanagóy paxta teriw kombaynları tapsırıldı
Ózbekstan Respublikası Prezidentiniń arnawlı qararına muwapıq, Qaraqalpaqstan Respublikasında paxtashılıqtı rawajlandırıwǵa qaratılǵan áhmiyetli qádem taslandı.
2025-jılı Qaraqalpaqstan Respublikasında aymaqlardıń awıl xojalıǵı texnikasına bolǵan zárúrliginen kelip shıǵıp, aymaqlar kesiminde jetkerip beriwdiń pragnoz kórsetkishleri tiykarında 60 dana zamanagóy paxta teriw kombaynları fermer xojalıqlarına lizing tiykarında berildi. Bul kombaynlar Túrkiya hám Qıtayda islep shıǵarılǵan bolıp, aldıńǵı texnologiyaları menen ajıralıp turadı.
Kombaynlardı tapsırıw máresimi Qaraqalpaqstan Respublikası Joqarǵı Keńesiniń Awıl hám suw xojalıǵı máseleleri boyınsha komiteti baslıǵı A.Jumanazarov tárepinen ótkerildi. Bul is-ilaj tek ǵana fermerler ushın emes, al pútkil Qaraqalpaqstan xalqı ushın úlken áhmiyetke iye. Sebebi bul waqıya ǵárezsizligimizdiń 34 jıllıǵı múnásibeti menen fermerlerge ózgeshe sawǵa boldı.
Jańa kombaynlar paxta teriw processin ádewir tezlestiredi hám jeńillestiredi, zúrááttiń sapasın arttıradı hám qol miynetin azaytadı. Bul bolsa, óz gezeginde, fermerlerdiń dáramatın arttırıwǵa hám Qaraqalpaqstan ekonomikasınıń rawajlanıwına xızmet etedi.
