Awıl xojalıǵında quyash energiyasınan paydalanıw boyınsha Xorezm tájiriybesi úyrenildi

Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Shuhrat Teshaevtıń basshılıǵında Tórtkúl, Ellikqala, Ámiwdárya hám Beruniy rayonlarınıń hákimleri, sonday-aq, barlıq rayon hákimleriniń awıl hám suw xojalıǵı máseleleri boyınsha orınbasarlarınıń qatnasıwında Xorezm wálayatına ámeliy sapar shólkemlestirildi.

Bul sapardan gózlengen tiykarǵı maqset – awıl xojalıǵında suwǵarıw tarmaqlarında quyash panellerinen nátiyjeli paydalanıw boyınsha Xorezm wálayatınıń aldınǵı tájiriybesin úyreniwden ibarat.

Ámeliy sapar baǵdarlaması Shavat rayonında jaylasqan Yusuf Hamadoniy zıyarat etiw ornın zıyarat etiwden baslandı. Zıyarat waqtında Quran oqılıp, elimizdiń tınıshlıǵı hám xalqımızdıń abadanlıǵı jolında jaqsı niyetler etildi.

Bunnan soń delegaciya Shavat rayonı “Sohibkor” APJ aymaǵındaǵı Udachi kanalı boyında jaylasqan fermer xojalıǵında bolıp, quwatlılıǵı 200 kVt bolǵan quyash panelleri jumısı menen jaqınnan tanıstı. Bul sistema arqalı fermer xojalıǵında suwǵarıw ushın paydalanılatuǵın suw nasosları quyash energiyası járdeminde isletiledi, artıqsha islep shıǵarılǵan elektr energiyası bolsa mámleketlik tarmaqqa satılıp, qosımsha dáramat alınbaqta.

Keyingi mánzil Úrgensh rayonında qurılıp atırǵan “Eko baǵ” joybarı boldı. Bul jerde alıp barılıp atırǵan kókelemzarlastırıw, terek egiw hám qurılıs jumısları processleri menen tanısıp, joybar sheńberindegi jumıslar joqarı bahalandı.

Ámeliy sapar dawamında úyrenilgen tájiriybelerdi Qaraqalpaqstan Respublikasında engiziw boyınsha tiyisli usınıslar islep shıǵılıwı belgilep alındı.