Taxtakópir rayonında ǵálle jetistiriwde ónimdarlıqtı arttırıw boyınsha kórgizbeli seminar bolıp ótti

Taxtakópir rayonındaǵı “A.Adilov” APJ aymaǵındaǵı “Gafur-taxta” fermer xojalıǵınıń atız maydanlarında ǵálle eginleri mısalında kórgizbeli ámeliy seminar bolıp ótti.

Onda dán hám salı ilimiy-óndirislik birlespesiniń direktorı D.Utambetov, Qaraqalpaqstan Respublikası Ministrler Keńesiniń awıl hám suw xojalıǵı boyınsha sekretariatınıń baslıǵı F.Nurmuxammedov hám awıl xojalıǵı tarawınıń wákilleri qatnastı.

Seminarda ǵálle jetistiriwdi durıs shólkemlestiriw, zúráátlilikti arttırıw, jerlerdi shor juwıwǵa tayarlaw, suwdı únemleytuǵın texnologiyalardı engiziw, suwǵarıw tarmaqların betonlastırıw arqalı suw resurslarınan nátiyjeli paydalanıw máseleleri dodalandı.

Ilajda fermer xojalıqlarınıń basshıları, klasterlerdiń wákilleri, awıl xojalıǵı xızmetkerleri hám taraw qánigeleri dala sharayatında ámeliy usınıslar hám aldınǵı tájiriybeler menen tanıstı. Qánigeler agrotexnikalıq ilajlardı belgilengen múddetlerde hám sapalı ámelge asırıw boyınsha túsinikler berdi.