Beruniy rayonında zamanagóy agrotexnologiyalar tiykarında joqarı ónimdarlıqqa qaray qádem

Beruniy rayonındaǵı «Yoldosh Katli» fermer xojalıǵı 2026-jıl zúrááti ushın ulıwma egislik maydanların anıq reje tiykarında qáliplestirip, agrotexnikalıq ilajlardı baslap jiberdi. Xojalıq tárepinen 22 gektar maydanǵa ǵálle, 46 gektarǵa paxta, sonday-aq 1 gektar jerge kartoshka hám paliz eginleri egilgen.

Fermer xojalıǵı mámleketimiz basshısı tárepinen awıl xojalıǵı tarawına qaratılıp atırǵan joqarı itibar hám jaratılıp atırǵan imkaniyatlardan ónimli paydalanbaqta. Atap aytqanda, 10 gektar ǵálle maydanında suwdı únemlewshi texnologiyalar — jańbırlatıp suwǵarıw sisteması engizilip, bul baǵdarda ajıratılǵan subsidiyalardan paydalanılǵan.

Nátiyjelilik kórsetkishleri de jıldan-jılǵa artıp barmaqta. Máselen, ótken jılı bul maydannan hár gektarınan 70 centnerden biyday zúrááti alınǵan bolsa, bıltırǵı jılı bul kórsetkishti 100 centnerge jetkeriw rejelestirilgen.

Bunnan tısqarı, fermer xojalıǵı tárepinen zamanagóy awıl xojalıǵı texnikaları 10 jıl múddetke lizing tiykarında satıp alınıp, óndiris ónimliligin arttırıwǵa xızmet etpekte. Ilimiy tásildi keńnen engiziw, tájiriybeli hám potenciallı qánigeler menen sheriklikte islesiw bolsa joqarı ónimdarlıqqa erisiwde áhmiyetli faktor bolmaqta.