ǴXQ wákilleri ushın baǵshılıq xojalıqlarınıń jumısı boyınsha media-tur shólkemlestirildi Qaraqalpaqstan Respublikası Awıl xojalıǵı ministrligi Málimleme xızmeti hám Agrosanaattı rawajlandırıw agentligi tárepinen Kegeyli hám Qaraózek rayonlarında jumıs alıp barıp atırǵan baǵshılıq xojalıqları hám intensiv baǵlardıń jumısı menen jaqınnan tanısıw maqsetinde ǵalaba xabar quralları wákilleri ushın media-tur shólkemlestirildi. Media-turdıń dáslepki mánzili Kegeyli rayonında jaylasqan Akademik M.Mirzaev atındaǵı Baǵshılıq, júzimgershilik hám vinoshılıq ilimiy-izertlew institutı boldı. Ilaj dawamında ǴXQ wákilleri ilimiy-tájiriybe stanciyasınıń jumısı, baǵshılıq tarawında alıp barılıp atırǵan ilimiy izlenisler hám ámeliy tájiriybeler menen jaqınnan tanıstı. Málim etiliwinshe, stanciya aymaǵında 7 gektar maydanda baǵ shólkemlestirilgen bolıp, onda alma hám shabdal jetistirilmekte. Házirgi kúnde 12 túrdegi sırt el alma sortları jáne 4 túrli gibrid sort tájiriybe tárizinde egilip, olardıń aymaq klimatına beyimlesiwi hám ónimdarlıǵı sınaqtan ótkerilmekte. Sonday-aq, baǵshılıqtı rawajlandırıw hám sapalı náller menen támiyinlew maqsetinde ilimiy-tájiriybe stanciyasında 60 mıń dana miywe nálleriniń tayarlanıp atırǵanı atap ótildi. Media-turdıń gezektegi mánzili Qaraózek rayonında jumıs alıp barıp atırǵan “Aytbay jeri” JShJ boldı. Kárxananıń 7 gektar jer maydanına 2023-jılı “Santa Mariya” sortlı almurt nálleri egilgen. Házirgi kúnde baǵda agrotexnikalıq ilajlar belgilengen tártipte alıp barılmaqta. Kárxana basshıları tárepinen keleshekte jetistiriletuǵın almurt ónimin sırtqı bazarlarǵa eksport etiw, sol arqalı eksport kólemin arttırıw hám baǵshılıq ónimleriniń básekige shıdamlılıǵın arttırıw rejelestirilip atırǵanı málim etildi. Bul media-tur baǵshılıq tarawında ámelge asırılıp atırǵan jumıslar, ilimiy kózqaraslar hám eksport potencialına iye joybarlardı keń jámiyetshilikke jetkeriwde úlken áhmiyetke iye.