Beruniy rayonında jasawshı baǵman qıytaq jerinde 10 túrden aslam miyweler jetistirip, kúnine 3 mln som dáramat kórmekte Beruniy rayonı “Shabbaz” awıl puqaralar jıyını aymaǵında jasawshı Mumin Hasanov házirgi waqıtta 70 jasta. Úyinde bos otırmaw ushın 28 sotıx jer maydanında 10 túrden aslam miywe jetistiredi. Baǵında 5 túrli shabdal jetistiretuǵın qaharmanımız bir kúnde 300-400 kg shabdal miywesin qońsı wálayatlarǵa satıwdı jolǵa qoyǵan. Áhmiyetlisi, qarıydarlar miywelerdi baǵmannıń úyinen ózleri kelip alıp ketedi. Ózbekstan Respublikası Prezidentiniń 2025-jıl 14-fevraldaǵı “Qıytaq jer iyeleri hám diyxan xojalıqlarınıń jumısında zamanagóy shólkemlestiriw sistemasın engiziw hám qarjılay qollap-quwatlawdıń qosımsha ilajları haqqında”ǵı pármanı tiykarında aymaqta sistemalı jumıslar alıp barılmaqta. Bul baǵdarda aymaq xalqı da baǵshılıqta belsendi hám intaker. Nátiyjede, baǵmanlar bir túp nálde 4-5 túrli miywe túrlerin jetistirmekte. Tájiriybeli baǵmannıń aytıwınsha, bul miywe nálsheleri jazdıń ıssı kúnlerinde suwsızlıqqa shıdamlı boladı eken. Juwmaqlap aytqanda, xalıqtıń bunday baslamaları nátiyjesinde tek ǵana shańaraqlar dáramat tawıp qoymastan, al ishki bazarlar tábiyiy hám sapalı, arzan ónimler menen de támiyinlenbekte.