ÁMIWDÁRYADA AWIL XOJALIǴIN RAWAJLANDIRIWǴA BAǴISHLANGAN RESPUBLIKA SEMINARI ÓTKERILDI

Ámiwdárya rayonında awıl xojalıǵı tarawın rawajlandırıw, bar imkaniyatlardan nátiyjeli paydalanıw hám aldınǵı tájiriybelerdi ǵalaba en jaydırıw máselelerine baǵıshlanǵan respublikalıq kólemdegi seminar bolıp ótti.

Onda Qaraqalpaqstan Respublikası Ministrler Keńesiniń Baslıǵı Farxod Ermanov, Baslıqtıń awıl hám suw xojalıǵı boyınsha orınbasarı Kamil Aytbaev, barlıq rayonlardıń hákimleri, awıl xojalıǵı máseleleri boyınsha hákim orınbasarları hám taraw boyınsha respublikalıq kólemdegi shólkemlerdiń juwapkerleri qatnastı.

Seminar dawamında rayonnıń Shoykól, Tolqın hám Aq altın awılları aymaqlarındaǵı fermer xojalıqlarında ámelge asırılıp atırǵan jumıslar úyrenildi.

Sonıń ishinde, qatnasıwshılar biyday egiw processleri, paxta jıyın-terimi máwsiminiń barısı, awıl xojalıǵı texnikalarınan nátiyjeli paydalanıw, agrotexnikalıq ilajlardıń shólkemlestiriliwi menen jaqınnan tanıstı.

Seminar dawamında Ámiwdárya rayonında awıl xojalıǵı tarawında jaratılǵan ámeliy tájiriybe hám imkaniyatlar kórsetildi.