Taqıyatas rayonı hákimliginiń májilisler zalında awıl xojalıǵı tarawına baylanıslı seminar bolıp ótti.
Seminarda, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayev, rayon hákimi K.Aytbaev hám taraw wákilleri qatnastı.Onda Ózbekstan Respublikası Prezidentiniń 2024-jıl 30-dekabrdegi “Awıl xojalıǵı maydanlarındaǵı qosımsha imkaniyatlardan paydalanǵan halda ónim jetistiriwdi kóbeytiwge baylanıslı is-ilájlar haqqında”ǵı PQ-465-sanlı qararı talaplarınıń orınlanıwı boyınsha aytıp ótildi.
Atap aytqanda, atız shetlerine, kanallar, kollektor-drenaj tarmaqları átirapındaǵı maydanlarǵa eksportbap eginlerdi egiw wazıypası belgilenip alındı.
Sonday-aq, qarar talapları tiykarında dala shetlerine hár jılı 1-aprelge shekem eginler egilmegen hám jıl dawamında ónim jetistirilmegen jaǵdaylar anıqlansa, bárshe egislik maydanlarǵa úsh ese salıq esaplanatuǵınlıǵı, dala shetlerin ekilemshi ijaraǵa alǵan ijarashılarǵa Agroinspekciya tárepinen BEMnıń 10 esesine shekem járiyma qollanılıwı hám de awıl xojalıǵı tarawına ajratılǵan jeńilletilgen kreditler toqtatılatuǵını atap ótildi.
