Suwǵarılatuǵın maydanlarda awıl xojalıǵı eginlerinen mol hám sapalı zúráát jetistiriwde topıraqqa tiykarǵı islew beriw, yaǵnıy gúzgi shúdigarlaw úlken áhmiyetke iye.Jerlerdi sapalı shúdigarlawǵa tayarlaw ushın traktor hám pluglar aldınnan jumısqa tayar halatqa keltiriliwi hám sazlanıwı, atızlar bolsa súrimge tayar bolıwı zárúr.Hár jılı elimizde máwsim basınan shigit egiwge jer maydanların tayarlaw, shor juwıw, jerdi gúzde sapalı túrde shúdigarlawǵa ayrıqsha itibar qaratıladı.
Respublikamız rayonlarında 2025-jıldıń ónimi ushın egislik jerlerdi tayarlaw, shúdigarlaw jumısları nátiyjeli dawam etpekte.Atap aytqanda, jámi 85 mıń gektar jer maydanların shúdigarlaw jumısları belgilengen bolıp, búgingi kúnge kelip 72 mıń gektardan aslamı, yaǵnıy 85 procenti shúdigarlandı.Bul agrotexnikalıq ilaj Ellikqala rayonında da áhmiyetli jumıslardıń biri qatarında alıp barılmaqta.
Awıl xojalıǵında eginlerden joqarı hám sapalı ónim alıw eń aldı menen egilgen maydannıń ónimdarlıǵına baylanıslı.Buǵan baylanıslı eń zárúrli agrotexnikalıq ilajlardan biri topıraqqa tiykarǵı qayta islew, yaǵnıy shúdigarlaw esaplanadı.Shúdigarlaw topıraqtıń barlıq qásiyetlerine: agrofizik, agroximiyalıq, biologiyalıq ózgesheliklerine unamlı tásir etetuǵın process bolıp, bul waqtında hám sapalı ámelge asırılsa topıraqtıń kólem massası, hawa almasıwı, mikrobiologiyalıq proccesleri sezilerli dárejede jaqsılanadı.
