Ózbekstan Respublikası Awıl xojalıǵı ministri I.Abdurahmonov basshılıǵında Qaraqalpaqstan awıl xojalıǵı hám agrotexnologiyalar institutı májilisler zalında arqa aymaqta jumıs alıp barıwshı klaster, fermer hám diyqan xojalıqları basshıları, taraw juwapkerleri ushın seminar-trening ótkerildi.

Belgilengen tiykarǵı wazıypalarǵa baǵıshlanǵan prezentaciya kórgizbesi menen baslanǵan treningte jańa agrotexnologiya hám jańa usıllardı qollanıw, atız shetlerinen ónimli paydalanıw, salma hám kollektorlardı betonlastırıw, terek shaqaların komplektlew arqalı joqarı nátiyjege erisiw máselelerine itibar qaratıldı.

I.Abdurahmonov paxtashılıqta “BT” ǵawasha sortların jetistiriw, kesellik hám zıyankeslerge shıdamlılıqtı basqarıw hám de jergilikli intensiv agrotexnologiyalardı engiziw ushın fermerlerdi metodikalıq qollanbalar menen támiyinlew zárúrligin atap ótti.Sonday-aq, bıyılǵı jıldıń ónimi ushın jergilikli hám sırt el ǵawasha sortların jaylastırıwda itibar qaratılıwı kerek bolǵan tárepleri hám de ǵálleshilikte yarovizatsiyalangan tuqımlardıń abzallıqları ilimiy faktler tiykarında túsindirildi.

Seminar-treningten soń, bul jerde fermer hám klaster xojalıqlarınıń wákilleri ushın kóshpeli qabıllaw shólkemlestirildi.Onda, fermerler hám diyqanlardıń huqıqların qorǵaw, olardıń miynet sharayatların jaqsılaw, óndiris nátiyjeliligin arttırıw hám de mashqalalardı sheshiw boyınsha anıq usınıslar berildi.

Kóshpeli qabıllaw dawamında hár bir mashqala individual tárizde kórip shıǵılıp, anıq hám sistemalı qatnaslar arqalı kóplegen máseleler sheshildi.

I.Abdurahmonov barlıq sorawlarǵa juwap berip, Mámleketimiz basshısı tárepinen qol qoyılǵan jańa qarar hám pármanlar tarawdı jáne de rawajlandırıw, fermerler hám diyqanlardıń huqıqların qorǵaw, miynet sharayatların jaqsılaw hám nátiyjelilikti arttırıwǵa xızmet etiwi menen áhmiyetli ekenligin atap ótti.