Kúnniń ekinshi yarımında Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayev 2025-jıl zúrááti ushın shigit egilgen maydanlarda agrotexnikalıq is-ilajlardı ámelge asırıw, sonday-aq, 1-kultivaciyalaw, azıqlandırıw, bioónim jetistiriw hám basqa da jumıslardı kózden keshiriw maqsetinde Nókis rayonındaǵı “Arbashı” awıl puqaralar jıyınındaǵı “Nukus agro” juwapkershiligi sheklengen jámiyeti hám Kegeyli rayonındaǵı “Ishanqala” awıl puqaralar jıyınındaǵı “Yulduz” fermer xojalıqlarında seminar ótkerdi.
Oǵan rayon hákimleri, fermerler hám awıl xojalıǵı tarawı xızmetkerleri qatnastı.
Seminarda 2025-jıl zúrááti ushın shigit egilgen maydanlardıń jaǵdayı, agrotexnikalıq is-ilajlardı óz waqtında hám sapalı orınlawdıń áhmiyeti, sonday-aq, zamanagóy agrotexnika usıllarınan paydalanıwdıń artıqmashılıqları talqılandı.
Sh.Teshayev óz sózinde awıl xojalıǵı tarawında innovaciyalıq jandasıwlardı engiziwdiń áhmiyetli ekenligi, zamanagóy texnologiyalardı qollanıw, suwǵarıw sistemaların jetilistiriw arqalı ónimdarlıqtı arttırıw hám sapalı ónim jetistiriw múmkinligin ayttı.
Seminar dawamında fermerlerge 1-kultivaciya, azıqlandırıw, bioónim jetistiriw hám basqa da agrotexnikalıq jumıslardı durıs orınlaw boyınsha ámeliy másláhátler berildi.
Rayon hákimleri óz gezeginde fermerlerge hár qanday máseleler júzege kelgende mámleket tárepinen kórsetiletuǵın járdem hám qollap-quwatlaw haqqında maǵlıwmat berdi.
Bul seminar awıl xojalıǵı tarawında innovaciyalıq jandasıwlardı engiziwge qaratılǵan áhmiyetli qádem bolıp, keleshekte bul tarawda jáne de úlken jetiskenliklerge erisiwge múmkinshilik beredi.
