Paxta atızlarında kórgizbeli seminar

Shımbay rayonı “Baxıtlı” awıl puqaralar jıyını aymaǵındaǵı “Qudaybergen Guldana” fermer xojalıǵı hám Qaraózek rayonı “Berdax” awıl puqaralar jıyını aymaǵındaǵı “Qaraqalpaq agro klaster” juwapkershiligi sheklengen jámiyetiniń paxta maydanlarında kórgizbeli seminar shólkemlestirildi.

Seminar paxta eginleriniń ónip shıqqan ǵawashaların qatar araların jumsartıw, jabayı shóplerden tazalaw, zıyankeslerden hám keselliklerden qorǵawǵa baǵıshlandı.

Oǵan, Qaraqalpaqstan Respublikası Joqarǵı Keńesiniń komitet baslıǵı A.Jumanazarov, Qaraqalpaqstan Respublikası fermerler keńesiniń baslıǵı I.Yusupov, rayon hákimleri, awıl xojalıǵına baylanıslı shólkemler hám fermer xojalıqlarınıń basshıları qatnastı.

Seminar dawamında fermerlerge paxtanı zıyankeslerden qorǵaw, suwǵarıw, tógin hám basqa da áhmiyetli ámeliy máseleler boyınsha ámeliy usınıslar berildi. Qánigeler tárepinen paxta eginlerin tárbiyalawda qollanılatuǵın zamanagóy texnikalar, awıl xojalıǵı texnikası hám tóginler kórsetildi. Fermerler ózlerin qızıqtırǵan sorawlarǵa juwap alıw imkaniyatına iye boldı hám tájiriybeli qánigeler menen pikir alıstı.