Shomanay rayonında ǵálle jıyın-terim máwsimine tayarlıq kórilmekte

Shomanay rayonında ǵálle jıyın-terim máwsimine qızǵın tayarlıq jumısları alıp barılmaqta. Rayonda jetistirilgen biyday zúráátin tolıq hám sapalı jıynap alıw maqsetinde kombaynlardıń texnikalıq jaǵdayın kózden ótkeriwge qaratılǵan kórgizbeli seminar shólkemlestirildi.

Seminarǵa Shomanay rayonı hákimi A.Ametov, Respublikadan biriktirilgen jumısshı topar aǵzaları, rayonlıq awıl xojalıǵı tarawınıń wákilleri hám mexanizatorlar qatnastı.

Seminar dawamında taraw qánigeleri tárepinen ǵálle zúráátin qısqa múddetlerde jıynap alıw boyınsha usınıslar berildi. Kombaynlardıń texnikalıq jaǵdayı, olardıń islew mexanizmleri hám qáwipsizlik qaǵıydalarına ayrıqsha dıqqat qaratıldı.

Shomanay rayonında ǵálle jıyın-teriminde qatnasatuǵın barlıq kombaynlardıń texnikalıq jaǵdayı tolıq tekseriliwi hám zárúr ońlaw jumısları óz waqtında ámelge asırılıwı rejelestirilgen. Bul is-ilajlar rayonda jetistirilgen biyday zúráátin joǵaltıwsız hám qısqa múddetlerde jıynap alıwdı támiyinlewge xızmet etedi.