Ámiwdáryada paxta maydanların suwǵarıw boyınsha seminar bolıp ótti
Ámiwdárya rayonı Tolqın awıl puqaralar jıyınındaǵı “Xidirov Samad” fermer xojalıǵı paxta atızında ǵawasha maydanlarında birinshi suwǵarıw jumısların durıs shólkemlestiriw boyınsha ámeliy seminar ótkerildi.
Oǵan, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayev, rayon hákimi S.Xojametov, aldıńǵı fermerler, agronomlar, suw xojalıǵı qánigeleri hám taraw wákilleri qatnastı.
Seminarda suw resurslarınan nátiyjeli paydalanıw, birinshi suwǵarıwdı agrotexnikalıq talaplarǵa muwapıq shólkemlestiriw, ónimdarlıqtı arttırıw hám suwdı únemlew texnologiyaların engiziw máseleleri talqılandı.
Sh.Teshayev suw resurslarınan aqılǵa muwapıq paydalanıw, atızlardı suwǵarıwda zamanagóy usıllardı qollanıw hám fermerler menen birge islesiwdi kúsheytiw zárúr ekenligin atap ótti.
Paxtanıń awıl xojalıǵındaǵı áhmiyeti, suwǵarıwdıń ónimdarlıqqa tásiri, óz waqtında suwǵarıwdıń artıqmashılıqları hám nadurıs suwǵarıwdıń keri aqıbetleri haqqında sóz etildi.
S.Xojametov suwǵarıwdı jobalastırıwda sistemalı qatnas jasawdıń áhmiyetli ekenligin atap ótip, suw sarplawı menen zúráátlilik arasında teńsalmaqlılıqtı támiyinlewge baǵdarlanǵan ilajlardı kúsheytiw boyınsha kórsetpeler berdi.
Seminar dawamında “Xidirov Samad” fermer xojalıǵında ámeliy kórgizbe ótkerilip, qatnasıwshılar birinshi suwǵarıw jumıslarınıń shólkemlestiriliwi menen tanıstı. Qánigeler tamshılatıp suwǵarıw, jerdiń meliorativlik jaǵdayın saqlaw hám suwdı únemlaw boyınsha usınıslar berdi.
Bunday seminarlar paxta jetistiriwde zamanagóy qatnastı keńeytiw, resurslardan aqılǵa muwapıq paydalanıw hám awıl xojalıǵında turaqtı nátiyjelerge erisiwde úlken áhmiyetke iye.
