“Tórtkúl paxta talshıǵı” klasterinde ǵawashanı chekankalaw boyınsha kórgizbeli seminar ótkerildi

🇺🇿 Búgin Tórtkúl rayonınıń “Ullıbaǵ” APJ aymaǵında jaylasqan “Tórtkúl paxta talshıǵı” JShJ ǵálleshilik klasteri jer maydanında ǵawashanı chekankalaw boyınsha kórgizbeli seminar bolıp ótti. Bul áhmietli ilajda Qaraqalpaqstan Respublikası Ministrler Keńesi Baslıǵınıń Awıl hám suw xojalıǵı máseleleri boyınsha orınbasarı-Awıl xojalıǵı ministri Sh. Teshaev, rayon hákiminiń awıl hám suw xojalıǵı máseleleri boyınsha orınbasarı J.Xudaybergenov, tiyisli shólkemlerdiń juwapkerleri hám rayondaǵı fermer xojalıqlarınıń basshıları qatnastı.

Seminardıń tiykarǵı maqseti – fermerlerge ǵawashanı tárbiyalawda eń áhmietli agrotexnikalıq ilajlardan biri bolǵan chekanka processin teoriyalıq hám ámeliy jaqtan jáne de tereń túsindiriw, zamanagóy usıllar hám aldınǵı tájiriybelerdi úyretiwden ibarat boldı.

Kórgizbeli seminar dawamında fermerler chekankalaw procesin tikkeley dala sharayatında baqlaw imkaniyatına ie boldı. Agronomlar hám tájiriybeli qánigeler chekankanı ámelge asırıwdıń hár qıylı usılları, durıs biyiklikti tańlaw, ósimlikti zıyanlamaw hám basqa da áhmietli tárepler boyınsha ámeliy kónlikpelerdi kórsetti. Sonday-aq, qatnasıwshılar ózlerin qızıqtırǵan sorawlarǵa juwap aldı hám óz-ara tájiriybe almasıdı.

Bunday seminarlar awıl xojalıǵında jańa texnologiyalardı engiziw, ónimdarlıqtı arttırıw hám fermerlerdiń bilim potencialın joqarılatıwda ayrıqsha áhmietke ie. “Tórtkúl paxta talshıǵı” klasteriniń bul baslaması rayon paxtashılıǵınıń rawajlanıwına úles qosıp, keleshekte joqarı zúráát alıw ushın bekkem tiykar jaratadı.