Ǵawasha qatar araların suwǵarıw boyınsha seminar shólkemlestirildi
Nókis rayonı “Arbashı” awıl puqaralar jıyını aymaǵındaǵı “Nukus agro” juwapkershiligi sheklengen jámiyeti hám Taxtakópir rayonı “Ózbekstan” mákan puqaralar jıyını aymaǵındaǵı “Pishenlik-taxta” fermer xojalıǵında ǵawasha qatar araların suwǵarıw texnologiyalarına baǵıshlanǵan seminar shólkemlestirildi.
Seminar Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Sh.Teshayevtıń basshılıǵında ótkerildi. Oǵan fermer xojalıqlarınıń basshıları, suw xojalıǵı tarawınıń qánigeleri, agrotexnika boyınsha juwapkerler hám basqa da tiyisli shólkemlerdiń wákilleri qatnastı.
Seminar dawamında qatnasıwshılarǵa ǵawasha qatar araların sapalı hám únemli usıllar menen suwǵarıw, suwdan nátiyjeli paydalanıw, ónimdarlilikti arttırıw, zamanagóy agrotexnologiyalardı ámeliyatqa engiziw baǵdarındaǵı aldınǵı tájiriybeler kórsetildi. Sonday-aq, seminar qatnasıwshıları óz-ara tájiriybe almasıw, bar mashqalalar hám olardı saplastırıw jolların talqıladı.
Bul seminar awıl xojalıǵında suw resurslarınan aqılǵa muwapıq paydalanıwdı násiyatlaw, ónimdarlilikti arttırıw hám agrotexnikalıq ilajlardıń nátiyjeliligin támiyinlewge xızmet etetuǵını menen áhmiyetli bolıp esaplanadı.
