Beruniyde jas hayal fermerdıń tabıslı jumısı – Gulnoza Djumaniyazova Beruniy rayonı Maqtımqulı awıl puqaralar jıyını aymaǵında jaylasqan “SURXON INTEGRAL” fermer xojalıǵınıń is júrgiziwshisi Gulnoza Djumaniyazova, jas bolıwına qaramastan, ákesiniń 114 gektar maydanǵa iye fermer xojalıǵın tabıslı basqarıp kelmekte. Gulnoza, hayal adam sıpatında awıl xojalıǵında óz ornın tapqanlıǵı menen maqtanadı. Gulnoza Djumaniyazovanıń atap ótiwinshe, xojalıqtıń 45 gektar maydanında shártnama tiykarında paxta jetistiriledi. Qalǵan jer maydanlarınıń 10 gektarına jońıshqa, 3,5 gektarına pomidor, 3,5 gektarına qıyar, 27 gektar maydanına qawın-ǵarbız hám asqabaq egilip, ónimler jergilikli hám qońsılas wálayatlarǵa satıladı. Bul arqalı tek ǵana dáramat tabılıp qoymastan, al xalıqtıń azıq-awqat qáwipsizligin támiyinlewge de úles qosıladı. “Nege hayal bola turıp, diyxanshılıq tarawın tańladıńız, bul qıyınshılıq tuwdırmay ma?” degen sorawǵa Gulnoza bılay juwap berdi: “Yaq, bul maǵan ata kásibim. Sonıń menen birge, shańaraq aǵzalarımnıń qollap-quwatlawı hám mámleketimizdiń fermerler hám isbilermenlerge berip atırǵan jeńillikleri, jaratılıp atırǵan imkaniyatlar maǵan kúsh-quwat baǵıshlaydı. Usı payıttan paydalanıp, húrmetli Prezidentimizge óz minnetdarshılıǵımdı bildiremen.” Gulnoza Djumaniyazovanıń tabıslı xızmeti awıl xojalıǵında hayal-qızlardıń ornı barǵan sayın bekkemlenbekte ekeniniń ayqın dálili bolıp esaplanadı. Ol óziniń miynetsúygishligi hám pidayılıǵı menen basqalarǵa úlgi bola aladı.