Qaraqalpaqstanda miywe hám júzimshilik rawajlanbaqta: ǴXQ wákilleri ushın press-tur shólkemlestirildi

Qaraqalpaqstan Respublikası Awıl xojalıǵı ministrligi hám Agrosanaattı rawajlandırıw agentliginiń Qaraqalpaqstan Respublikası bólimi birgelikte miywe hám júzim jetistiriwshi fermerlerdiń jumısı menen jaqınnan tanıstırıw maqsetinde ǵalaba xabar quralları wákilleriniń qatnasıwında Ámiwdárya hám Ellikqala rayonlarına press-tur shólkemlestirildi.

Press-tur qatnasıwshıları dáslep Ámiwdárya rayonı Shaykól awıl puqaralar jıyınındaǵı “Amu anarları” JShJ tárepinen shólkemlestirilgen 8 gektar anar baǵı, “Mańǵıt omat sawda” JShJ tárepinen 12 gektar maydanda shólkemlestirilgen júzim baǵları hám “Amu tolqın balıǵı” JShJ tárepinen shólkemlestirilgen 10 gektar alma hám 6 gektar erik baǵları menen tanıstırıldı.

Ámiwdárya rayonında baǵmanshılıq hám júzimshilik baǵdarındaǵı 61 awıl xojalıǵı kárxanaları bar bolıp, olarda jámi 1046 gektar maydanda miyweli baǵlar bar. Sonnan 641 gektarı zúráátli baǵlar, 405 gektarı jańa baǵlar bolıp esaplanadı.

Bıyılǵı báhár máwsiminde fermer xojalıqları hám awıl xojalıǵı kárxanaları tárepinen jámi 76 gektar maydanda intensiv baǵ shólkemlestirildi. Rayonda baǵshılıq tarawına qızıǵıwshılar kúnnen-kúnge kóbeyip barmaqta. Jaslar agentligi hám rayonlıq Agrosanaattı rawajlandırıw agentliginiń qánigeleri tárepinen awıl xojalıǵı kárxanaları shólkemlestirgen baǵlarda jumıssız jaslardı jumıs penen támiyinlew boyınsha is-ilajlar jolǵa qoyılǵan.