Deputatlar Qaraqalpaqstanda Prezident qararlarınıń orınlanıwın úyrenbekte 
Ózbekstan Respublikası Prezidentiniń basshılıǵında 2025-jıl 16-iyunda ótkerilgen videoselektor májilisinen kelip shıǵıp, Oliy Majlis Nızamshılıq palatası Qaraqalpaqstan Respublikasın sociallıq-ekonomikalıq rawajlandırıw boyınsha qabıl etilgen nızam astındaǵı hújjetlerdiń orınlanıw jaǵdayı ústinen parlament qadaǵalawın kúsheytiw maqsetinde aymaqta qadaǵalaw hám analiz tártibinde úyreniwler alıp barmaqta. 
Búgin, 7-avgust kúni deputatlar Z.Zoxidov hám R.Siddiqovlar Qaraqalpaqstan Respublikasınıń Taxtakópir rayonında bolıp, Prezidenttiń mal sharwashılıǵın rawajlandırıw hám suw resurslarınan nátiyjeli paydalanıwǵa qaratılǵan tómendegi qararlarınıń orınlanıwı ústinen parlament qadaǵalawın ámelge asırıw maqsetinde rayonda boldı.
* 2019-jıl 7-noyabrdegi PQ-4512-sanlı “Qaraqalpaqstan Respublikasında mal sharwashılıǵı tarawların tez pátte rawajlandırıw is-ilajları haqqında”ǵı; * 2020-jıl 3-iyuldegi PQ-4776-sanlı “Qaraqalpaqstan Respublikasında sharwashılıq tarmaqların tez pátler menen rawajlandırıw boyınsha qosımsha is-ilajlar haqqında”ǵı; * 2020-jıl 5-dekabrdegi PQ-4912-sanlı “Qaraqalpaqstan Respublikasında suw resurslarınan nátiyjeli paydalanıw hám jerlerdiń meliorativlik jaǵdayın jaqsılaw boyınsha keshiktirip bolmaytuǵın is-ilajlar haqqında”ǵı qararları. 
Deputatlar Taxtakópir rayonındaǵı Qaraoy APJ aymaǵındaǵı “Kausar tegirmon” JShJnıń sharwashılıq kompleksinde bolıp, ulıwma bahası 32 milliard somlıq sharwashılıqtı rawajlandırıw hám sútti qayta islewge baylanıslı iri joybarlar menen tanıstı. Házirgi waqıtta kárxananıń sharwashılıq kompleksinde 120 bas násilli iri qara mal bаǵılmaqta. Sonıń menen birge, sútti qayta islew joybarı da iske qosılıp, 7 puqaranıń turaqlı jumıs penen támiyinleniwi ámelge asırıldı. Sonday-aq, Taxtakópir rayonındaǵı “Qarаkólshilik ilimiy násilshilik tájiriybe stanciyası”nıń jumısı da úyrenip shıǵıldı.
Erteń, 8-avgust kúni deputatlar Qaraqalpaqstan Respublikasınıń Qońırat rayonında úyreniw is-ilajların dawam ettiredi.
Bul úyreniwlerdiń tiykarǵı maqseti – Prezident qararlarınıń orınlanıwın támiyinlew, aymaqlarda mal sharwashılıǵın rawajlandırıw, suw resurslarınan aqılǵa muwapıq paydalanıw hám jerlerdiń meliorativlik jaǵdayın jaqsılaw boyınsha ámelge asırılıp atırǵan jumıslardı baqlap barıw jáne bar máselelerdi anıqlaw hám olardı saplastırıw is-ilajların kóriwden ibarat.
