Jańa baslama – dáramatlı tarawǵa isenimli qádem

Búgingi kúnde elimizde awıl xojalıǵı tarawın rawajlandırıw, óndiristi keńeytiw hám xalıqqa sapalı azıq-awqat ónimlerin jetkerip beriw baǵdarında úlken imkaniyatlar jaratılmaqta. Bul imkaniyatlardan nátiyjeli paydalanıp atırǵan pidayı fermerlerimizden biri – Doschanov Raximboy” fermer xojalıǵınıń baslıǵı Alisher Doschanov bolıp tabıladı.

🔹 Ol Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı Shuhrat Teshaevtiń usınısı menen qusshılıq baǵdarın, atap aytqanda, úyrek jetistiriw jumısın jolǵa qoydı.

Xorezm wálayatınan 500 dana úyrek alıp kelinip, olardı baǵıw ushın arnawlı sharayatlar jaratıldı. Tıyanaqlılıq hám miynet esabınan házirgi kúnde bul úyrekler dáslepki bahasınan úsh esege joqarı bahada bahalanbaqta. Bul bolsa qusshılıqtıń tek paydalı emes, al perspektivalı taraw ekenligin ayqın dálillemekte.

️ Fermer Alisher Doschanovtıń atap ótiwinshe, bul jumıstıń dáramatlılıǵın kórip, keleshekte úyreklerdi kóbeytip, xojalıq jumısın jáne de keńeytiw, qosımsha jumıs orınların jaratıw niyetinde. Bunnan tısqarı Alisher Doschanov balıqshılıq penen de shuǵıllanıp, hár jılı xalıqqa 8-9 tonna balıq jetkerip bermekte.

✅ Sonday-aq, ol Prezidentimiz tárepinen jaratılıp atırǵan keń imkaniyatlardan paydalanıp, jeńilletilgen kredit tiykarında sharwashılıq xojalıǵın shólkemlestiriw rejelerin de alǵa qoymaqta.

Bul baslamalar awıl xojalıǵınıń jańa baǵdarların rawajlandırıw, jergilikli bazardı sapalı qusshılıq ónimleri menen támiyinlew hám xalıqtıń bántligin arttırıwda ayrıqsha áhmietke iye.

Doschanov Raximbay” fermer xojalıǵınıń basshısı Alisher Doschanovtıń baslamaları hám miynet súygishligi basqa fermerler ushın da úlgi bola aladı.