Qaraqalpaqstan Diyxanshılıq ilim-izertlew institutında press-tur ótkerildi

Búgin Qaraqalpaqstan Respublikası Awıl xojalıǵı ministrligi baspasóz xızmetiniń baslaması menen ǵalaba xabar quralları wákilleriniń qatnasıwında Shımbay rayonında jaylasqan Qaraqalpaqstan diyxanshılıq ilim-izertlew institutına press-tur shólkemlestirildi.

1958-jılı shólkemlestirilgen bul ilim dárgayı Qaraqalpaqstan awıl xojalıǵında áhmiyetli orın iyeleydi. Institut selekciya jetiskenliklerin keńnen sınaqtan ótkeriw, jańa sortlardı jaratıw hám olardıń birlemshi tuqımgershiligin shólkemlestiriw, sonday-aq, aymaqlardıń topıraq, klimat sharayatına sáykes resurs únemlewshi agrotexnologiyalardı islep shıǵıw menen shuǵıllanadı. Sonday-aq, jetekshi sırt-el ilimiy orayları menen birge islesiwdi jolǵa qoyıp, grantlar tartıw, tájiriybe hám málimleme almasıwǵa úlken itibar qaratılmaqta.

Institut qaramaǵında jámi 1022,01 gektar jer maydanı bolıp, sonnan 593,03 gektarı suwǵarılatuǵın jer bolıp esaplanadı. 2024-jıl ónimi ushın tájiriybe xojalıǵınıń jumıs rejesine bola, paxta, biyday, jońıshqa, gúnji, másh, bir jıllıq shópler hám ilimiy dala tájiriybeleri ushın eginler jaylastırılǵan.

Sońǵı jılları institut ilimpazları tárepinen jaratılǵan ǵawashanıń 2, biydaydıń 2, ayǵabaǵardıń 4, sudan shóbiniń 2, jońıshqanıń 1 jańa sortları Mámleketlik reestrge kirgizildi hám óndiriske engizildi. Sonıń ishinde, “Shımbay-5018” hám “KK-3535” sıyaqlı perspektivalı paxta sortları keń maydanlarda sınaqtan ótkerilmekte. Sonday-aq, “Shımbay,” “Aral” sıyaqlı biyday sortları da joqarı zúráátliligi menen tán alınıp, tuqımgershilik xojalıqlarına usınıldı.

Institutta jaratılǵan ilimiy nátiyjeler tek ǵana selekciya baǵdarında emes, al ot-jem eginleri boyınsha da ámeliy nátiyje bermekte. Keyingi jıllarda kommerciyalastırılǵan joybarlardan qosımsha qarjılar tawılıp, instituttıń rawajlanıwına qaratılmaqta.