Ámiwdárya rayonında jańa áwlad paxta teriw mashinaları boyınsha ámeliy kórgizbeli seminar bolıp ótti 
Ámiwdárya rayonında jańa áwlad paxta teriw mashinaların basqarıw boyınsha ámeliy kórgizbeli seminar shólkemlestirildi.
Onda Qaraqalpaqstan Respublikası Ministrler Keńesiniń Baslıǵı F.Ermanov, rayon hákimleri, awıl xojalıǵı xızmetkerleri, fermerler, sonday-aq paxta teriw mashinalarınıń operatorları hám mexanizatorlar qatnastı.
Seminar dáslepki rayon aymaǵındaǵı Tolqın awıl puqaralar jıyını aymaǵında jaylasqan “Xidirov Samad” fermer xojalıǵınıń paxta maydanında baslandı. Bul jerde Túrkiya Respublikasınıń “Cansa” kompaniyası tárepinen islep shıǵarılǵan paxta teriw mashinasınıń jumıs barısı hám onıń artıqmashılıqları qatnasıwshılarǵa kórsetildi.
Keyingi mánzil sıpatında Shaykól APJ aymaǵında jaylasqan “Shaykól Doslıq” fermer xojalıǵı paxta maydanında Qıtaydıń “Fm Word” kompaniyası islep shıǵarǵan paxta teriw mashinasınıń jumıs barısı hám onıń múmkinshilikleri menen tanıstırıldı.
Seminar juwmaǵında Ministrler Keńesiniń Baslıǵı F.Ermanovtıń basshılıǵında paxta mashinaların islep shıǵarıwshılardıń qatnasıwında májilis bolıp ótti. Májilisti F.Ermanov alıp bardı hám paxta jıyın-terim máwsimin shólkemleskenlik penen shólkemlestiriw boyınsha juwapkerlerge anıq tapsırmalar berdi. Bunnan soń májilis qatnasıwshıları paxta mashinaların islep shıǵarıwshı zavod wákillerine ózlerin qızıqtırǵan sorawlar menen múrájat etip, tolıq juwaplar aldı.
