Ellikqala rayonında fermerdiń paxta tapsırıw rejesi orınlandı

Ellikqala rayonı “Aqshakól” awıl puqaralar jıyını aymaǵında jaylasqan “Xudaybergen Ernazarov” fermer xojalıǵı mámleketke paxta tapsırıw boyınsha belgilengen rejeni tolıq orınladı.

Fermer xojalıǵınıń basshısı Ilham Ernazarovtıń atap ótiwinshe, xojalıqtıń ulıwma jer maydanı 60 gektardı quraydı. Sonnan 30 gektar maydan paxta, 25 gektar ǵálle eginlerine, qalǵan bólegi palız eginlerine mólsherlengen.
Paxta jetistiriwde joqarı zúráátke erisiwde zamanagóy agrotexnikalıq ilajlar menen bir qatarda, topıraq ónimdarlıǵın arttırıw ilajları da úlken áhmiyetke iye boldı.

Sonıń ishinde, Prezidentimizdiń 2024-jıl 13-fevral kúngi PQ-71-sanlı qararı tiykarında hár bir gektar jerge 500 kilogramnan biogumus tógini salınıp, jaqsı nátiyjelerge erisildi.

Ilham Ernazarovtıń aytıwınsha, bul baslama sebepli tek ǵana ónimdarlıq artqan emes, al mámleket tárepinen hár bir gektar ushın 1 million sumnan subsidiya ajıratılǵan.