Beruniy rayonında miyweli baǵ hám júzimzarlardı rawajlandırıw boyınsha ámeliy seminar ótkerildi

Qaraqalpaqstan Respublikası Beruniy rayonı Shabboz awıl puqaralar jıyını aymaǵında jaylasqan “Azat intensiv baǵ” fermer xojalıǵında miyweli baǵ-júzimzarlardı keńeytiw, bar bolǵanları haqqında maǵlıwmatlardı elektron platformaǵa kirgiziw hám gúzgi agrotexnikalıq is-ilajlardı sapalı shólkemlestiriw boyınsha kórsetpeli ámeliy seminar bolıp ótti.

Is-ilajda Agrosanaattı rawajlandırıw agentligi, sonday-aq, Agentliktiń Qaraqalpaqstan Respublikası hám Xorezm wálayatı bólimlerinen juwapker qánigeler qatnasıp, baǵshılıqta aldıńǵı texnologiyalardı engiziw boyınsha ámeliy túsinikler berildi.

Seminar dawamında júzim nállerin gúzgi suwıqlardan qorǵawdıń zamanagóy, únemli hám nátiyjeli usılları boyınsha tájiriybe shınıǵıwları ótkerilip, fermerler hám qánigelerge ámeliy kórsetpeler berildi.

Is-ilaj usı baǵdarda xızmet kórsetip atırǵan fermer xojalıqları ushın tájiriybe almasıw, ilimiy tiykarlanǵan usıllardı ámeliyatqa engiziw hám ónimdarlıqtı arttırıwda áhmiyetli orın tutadı.