Ózbekstan Respublikası Prezidentiniń 2025-jıl 9-dekabrdegi “Paxta hám ǵálleshilikte ónimdarlıqtı arttırıw ushın joqarı nátiyjeli intensiv agrotexnologiyalardı qollanıwdıń qosımsha ilajları haqqında”ǵı PQ-370-sanlı qararı hám Ózbekstan Respublikası Ministrler Kabinetiniń 2025-jıl 25-dekabrdegi “Paxta hám ǵálleshilikte ónimdarlıqtı arttırıw boyınsha qosımsha ilajlar haqqında”ǵı qararlarına tiykarlanıp Qaraqalpaqstan Respublikası Ministrler Keńesiniń 2026-jıl 8-yanvar kúngi arnawlı qararı qabıl etilgen. Jáne de Qaraqalpaqstan Respublikası Ministrler Keńesiniń 2026-jıl 31-yanvar kúni “Qaraqalpaqstan Respublikasında 2026-jılı awıl xojalıǵı óndiris kólemlerin arttırıw hám prognoz kórsetkishlerin támiyinlew ilajları haqqında”ǵı qararı qabıl etilgen.
Joqarıda qabıl etilgen bir qatar qararlarǵa tiykarlanıp Qaraqalpaqstan Respublikasında 2026-jıl ónimi ushın 80 mıń gektar maydanǵa paxta egiliwi rejelestirilgen bolıp, usı maydanlardıń 21 400 gektarında “Shinjon” usılında egip jetistiriw belgilengen. Búgingi kúnde usı maydanlardıń 71 mıń 618 gektar (89,5%) maydanlarında paxta egiwge jer tayarlanıp, 69 mıń 455 gektar (86,8%) maydanlarında paxta egiw jumısları alıp barıldı hám qalǵan maydanlarda egiw jumısların qısqa múddetlerde juwmaqlaw boyınsha barlıq ilajlar kórilmekte. Bıyılǵı paxta egiw máwsimine jámi 346 paxta egiw otryadları shólkemlestirilip, bul otryadlarǵa 15 mıń 590 texnika hám agregatlar biriktirilgen bolıp, usı texnikalar járdeminde egiw jumısları nátiyjeli alıp barılmaqta. Sonday-aq, bıyılǵı jıldıń ónimi ushın fermer hám awıl xojalıǵı kárxanalarınıń tiykarǵı maydanlarınıń 33 mıń 290 gektarına sonnan, 14 mıń 550 gektarına ovosh, 11 mıń 500 gektarına palız eginleri egildi. 7 mıń 240 gektar maydanǵa kartoshka egiw rejelestirilgen bolıp, búgingi kúnde jámi 26 mıń 585 gektar (79,9%) maydanlarda sonnan, 14 mıń 491 gektar ovosh, 10 mıń 377 gektar palız hám 1 mıń 717 gektar maydanda kartoshka egiw jumısları alıp barıldı hám bul ilajlar dawam etpekte. Bunnan tısqarı, 2026-jıl ónimi ushın 62 mıń gektar maydanda egilip tárbiyalanbaqta. Bul maydanlar tolıq ónip shıǵıp, búgingi kúnde 59 mıń 744 gektarı nayshalanıw fazasında hám 2 mıń 256 gektarı masaqlanıw yaǵnıy baslanǵısh fazalarında rawajlanbaqta. Ǵálle maydanların azotlı mineral tóginler menen gektarına ortasha 200 hám 300 kg. esabınan 2 márte azıqlandırıw jumısları tolıq alıp barılǵan bolıp, búgingi kúnde 36 mıń 618 gektar maydanda úshinshi azıqlandırıw jumısları ámelge asırıldı hám dawam etpekte. Bunnan tısqarı, ǵálle maydanlarına gektarına ortasha 5 tonnadan jámi 310 mıń tonna jergilikli tezek shıǵarıw rejelestirilgen bolsa, házirgi waqıtta 385 mıń tonnadan aslam tezeklerdi atız baslarına shıǵarıw jumısları ámelge asırıldı hám usı maydanlardı sherbet usılında suwǵarıw maqsetinde ortasha 5 gektarǵa 1 danadan jámi 12 mıń 400 dana qándek orları qazıldı hám búgingi kúnde 44 mıń 646 gektar (72%) maydanlarda báhárgi birinshi suwǵarıw jumısları alıp barıldı. Jáne de galle maydanlarında (suspenziya usılında) japıraqtan azıqlandırıw jumısları bir márte tolıq ámelge asırılǵan bolıp, ekinshi márte azıqlandırıw jumısları 57 procent maydanlarda ámelge asırılǵan bolıp, bul jumıslar ele de dawam etpekte.
