Kegeyli rayonında fermerler menen ushırasıw ótkerildi Kegeyli rayonı “Júzimbaǵ” APJ aymaǵında fermer xojalıqları basshılarınıń qatnasıwında ushırasıw bolıp ótti. Onda Ózbekstan Liberal-demokratiyalıq partiyası frakciyasınıń baslıǵı, Ózbekstan Fermerler keńesiniń baslıǵı A.Xaitov, Qaraqalpaqstan Respublikası Joqarǵı Keńesiniń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı A.Jumanazarov, Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri K.Aytbaev, Qaraqalpaqstan fermerler keńesiniń baslıǵı M.Xudaybergenov hám taraw juwapkerleri qatnastı. Ushırasıwda fermerlerge Awıl xojalıǵı ministrligi hám Ózbekstan Fermerler keńesiniń keshki kartoshka, avgust-sentyabr aylarında piyaz hám chesnok, sonday-aq, toqsanbastı usılında awıl xojalıǵı eginlerin jetistiriw boyınsha múrájatınıń mazmun-mánisi túsindirildi. Sonday-aq, máwsimlik eginlerdi óz waqtında egiw, jer maydanlarınan nátiyjeli paydalanıw, ónimdarlıqtı arttırıw hám qosımsha dáramat dáreklerin jaratıw boyınsha ámeliy usınıslar berildi. Sóylesiw dawamında fermerlerdiń pikir-usınısları tıńlanıp, olardı sheshiw boyınsha juwapkerlerge tiyisli tapsırmalar berildi.