Gúzgi shúdigar — kelesi jıl óniminiń bekkem tiykarı
«Jer súrseń gúz súr, gúz súrmeseń júz súr», deydi dana xalqımız. Bul naqıl biykarǵa aytılmaǵan. Óytkeni, gúzgi shúdigar jumısların óz waqtında hám sapalı ámelge asırıw kelesi jıl óniminiń mol bolıwında ayrıqsha áhmiyetke iye.
📍 Xojeli rayonı Ámiwdárya APJ aymaǵındaǵı “Aq tilek” fermer xojalıǵı atızlarında 2027-jıl ónimi ushın awıl xojalıǵı eginlerinen bosaǵan jer maydanlarında gúzgi shúdigar jumısların shólkemlestiriw, sonday-aq, jer paydalanıwshılardıń jer konturların muwapıqlastırıw hám keńeytiw máselelerine baǵıshlanǵan dala sharayatındaǵı ámeliy-kórgizbeli seminar bolıp ótti.
Seminarda Qaraqalpaqstan Respublikası Ministrler Keńesi Baslıǵınıń awıl hám suw xojalıǵı máseleleri boyınsha orınbasarı, Awıl xojalıǵı ministri Kamiljan Aytbaev, Ózagroinspekciyanıń Qaraqalpaqstan Respublikası basqarması baslıǵı Erpolat Qayıpbergenov, Xojeli rayonı hákiminiń awıl hám suw xojalıǵı máseleleri boyınsha orınbasarı A. Xudaybergenov, rayon awıl xojalıǵı tarawı juwapkerleri hám de fermer xojalıqları basshıları qatnastı.
Ilaj dawamında gúzgi shúdigar jumısların belgilengen agrotexnikalıq talaplar tiykarında sapalı shólkemlestiriw, jer maydanların kelesi máwsimge tayarlaw, jer konturlarınan nátiyjeli paydalanıw hám de olardı muwapıqlastırıw boyınsha ámeliy kórsetpeler berildi.
Sonday-aq, fermerlerge gúzgi atız jumısların óz múddetinde juwmaqlaw, jer ónimdarlıǵın saqlaw hám arttırıw jáne 2027-jıl ónimi ushın puqta tayarlıq kóriw boyınsha tiyisli usınıs hám tapsırmalar berildi.
