Tarawda ámelge asırılıp atırǵan jumıslardıń nátiyjeliligin úyreniw maqsetinde Ózbekstan Respublikası Awıl xojalıǵı ministri I.Abdurahmonov Qaraqalpaqstan Respublikasındaǵı Ámiwdárya rayonı “Chóykól” awıl puqaralar jıyını aymaǵındaǵı “Xudaybergen Nurımbetov” fermer xojalıǵında ámelge asırılıp atırǵan agrotexnikalıq jumıslar menen tanıstı.Atap aytqanda, atız shetlerinen únemli paydalanıw, alıp barılıp atırǵan egis processleri, terekler aralıǵı, olarǵa suwdıń tolıq jetip barıwın támiyinlew boyınsha islenip atırǵan háreketler, atız shetlerinde islenip atırǵan jumıslardı kózden ótkerdi.
Búgingi kúnde atız aymaǵındaǵı salmalardı betonlastırıw, onıń átirapındaǵı eginlerge baǵdarlanǵan suwdıń ısırap bolıw qáwpin saplastırǵan halda, onı durıs hám maqsetli baǵdarlaw da tiykarǵı wazıypalar qatarına kiredi.Usı maqsette usı aymaqtaǵı derlik 1 km aralıqqa teń salmanı betonlastırıw jumısları qızǵın dawam etpekte. Házirgi waqıtta salmanıń yarımı beton qaplama menen qaplanǵan.
Sonıń menen birge, juwapkerlerge atız shetlerine tereklerdi belgilengen tártipte egiw, irrigaciya sistemaların durıs jolǵa qoyıw, atız mádeniyatın qáliplestiriw, islenip atırǵan jumıslardıń nátiyjeliligin támiyinlew, aymaqta jetistirilip atırǵan eginlerdiń zúráátliligin, jerdiń ónimdarlıǵın támiyinlewge qaratılǵan kóplegen wazıypalar berildi.
