Búgin Qaraqalpaqstan Respublikası Awıl xojalıǵı ministrliginde topıraq qatlamı, ónimdarlıǵı, eroziyası, shorlanıwı hám topıraqtaǵı organikalıq uglerodtıń roli hám suw resurslarınan nátiyjeli paydalanıw, turaqlı awıl xojalıǵın júrgiziwdi támiyinlewge qaratılǵan ilajlar boyınsha ushırasıw bolıp ótti.
Onda Qaraqalpaqstan Respublikası Awıl xojalıǵı ministriniń birinshi orınbasarı A.Koziyev, TIQXMMI Milliy izertlew universitetiniń docenti A.Karimov, Topıraqtanıw institutınıń laboratoriya baslıǵı, professor R.Kurbantaev, “Innovaciya-ideya” JShJ baslıǵı G.Jumaniyazovalar qatnastı.
Ótkerilgen ushırasıwda topıraq qatlamı, ónimdarlıǵı, eroziyası, shorlanıwı hám topıraqtaǵı organikalıq uglerodtıń roli hám suwdıń sapasın monitoring etiw sistemasın ornatıw arqalı suw resursların aqılǵa uǵras basqarıw sonıń menen birge, tábiyǵıy sheshimlerge tiykarlanǵan oqıw qollanbaların islep shıǵıw hám bul arqalı awıl xojalıǵında zıyanlı pesticidlerden paydalanıwdı azaytıwǵa járdemlesiw boyınsha máseleler atap ótildi.
Sonday-aq, ushırasıw dawamında usı jıldıń 25-27-mart kúnleri Qońırat, Shımbay hám Nókis rayonlarında turaqlı awıl xojalıǵın júrgiziw, suw hám topıraq analizlerin ótkeriw, usı analiz nátiyjeleri menen tanıstırıw maqsetinde hár bir rayonda oqıw treninglerin shólkemlestiriw máseleleri dodalandı.
