Qońıratta jańa óndiris joybarları

Qaraqalpaqstan Respublikası Awıl xojalıǵı ministrliginiń jumısshı toparı jaqında Qońırat rayonına barıp, aymaqta ámelge asırılıp atırǵan sanaat hám agrar joybarlar menen tanıstı. Sapar dawamında “QONYRAT GOLDEN EGG” JShJ qus xojalıǵında boldı.

2023-jılı shólkemlestirilgen “QONYRAT GOLDEN EGG” JShJ búgingi kúnde zamanagóy qus xojalıǵı sıpatında xızmet kórsetpekte. Kárxana basshısı Uluǵbek Asanovtıń bildiriwinshe, xojalıq máyek jetistiriwge qánigelesken bolıp, onda Germaniyada jetistirilgen “Lohman Sandy” tuqımlı tawıqlar baǵılmaqta. Bul quslar Qanlıkól rayonındaǵı “Agro Business Qanlıkól” JShJ arqalı alıp kelingen. Joybardıń ulıwma qunı 2 milliard somdı quraydı.

Házirgi waqıtta xojalıqta 32 mıń bas tawıq baǵılmaqta. Jaqın arada bul kórsetkish 40 mıń basqa jetkeriliwi joba etilgen. Qus xojalıǵı kompleksi 4,5 gektar maydanda jaylasqan bolıp, jılına 7,5 million dana máyek islep shıǵarıw quwatlılıǵına iye. Kárxanada házirgi waqıtta 10 jergilikli puqara turaqlı jumıs penen támiyinlengen.

Qaraqalpaqstan Respublikası Awıl xojalıǵı ministrliginiń jumısshı toparı kárxanaǵa kelip, mashqalalardı tıńladı hám sheshimler boyınsha usınıslar berdi.