“Ǵállekeshler – Qaraqalpaqstannıń maqtanıshı!”

Qaraqalpaqstan Respublikası diyxan hám fermerleri tárepinen ǵálle jetistiriw boyınsha belgilengen joba tabıslı orınlandı. 2025-jıl zúrááti ushın 119 628 tonna ǵálle tapsırıw jobalanǵan bolsa, is júzinde 119 639 tonna ǵálle jetistirilip, mámleketke tapsırıldı.

Bul tabıs Prezidentimiz Shavkat Mirziyoyevtiń awıl xojalıǵın rawajlandırıw, agrar sektorın zamanagóylestiriw hám xalıqtı azıq-awqat penen támiyinlewge baǵdarlanǵan strategiyalıq siyasatınıń ámeliy kórinisi bolıp tabıladı. Mámleket tárepinen jaratılǵan qolaylı sharayatlar, zamanagóy texnologiyalardı engiziw, fermerlerge kórsetilip atırǵan hár tárepleme qollap-quwatlaw óz nátiyjesin bermekte.

Diyxan hám fermerlerdiń tınımsız miyneti, agronomlardıń bilim hám tájiriybesi, taraw xızmetkerleriniń pidayılıǵı bul joqarı nátiyjege erisiwde áhmiyetli orın iyeledi. Olar óz wazıypalarına shın júrekten qatnas jasap, juwapkershilik hám pidayılıq úlgisin kórsetti.

Házirgi waqıtta zúráátti qabıl etiw, saylap alıw, tazalaw hám saqlaw jumısları qadaǵalaw astında dawam ettirilmekte. Zamanagóy texnologiyalar hám úskeneler járdeminde ǵálleniń sapası hám saqlanıwı támiyinlenbekte.

Bul jetiskenlik Qaraqalpaqstannıń ekonomikalıq rawajlanıwına, xalıqtıń abadanlıǵın arttırıwǵa hám mámleketimizdiń azıq-awqat qáwipsizligin bekkemlewge xızmet etedi.