Nókis rayonında salını tamshılatıp suwǵarıw boyınsha innovaciyalıq joybar ámelge asırılmaqta
Press-tur qatnasıwshılarınıń keyingi mánzili rayondaǵı Dán hám salı ilimiy óndirislik birlespesiniń atız maydanında ámelge asırılıp atırǵan innovaciyalıq joybar menen tanıstı. Joybar sheńberinde 5 gektar maydanda salını tamshılatıp suwǵarıw texnologiyası Izrail hám Germaniya mámleketleriniń eń aldı texnologiyaları tiykarında tájiriybe retinde sınaqtan ótkerilmekte.
Házirgi waqıtta joybardıń sızılmaları hám jer maydanınıń sızılmaları islep shıǵılıp, suwǵarıw úskeneleri ornatıldı hám salı egilip, tájiriybe jumısları alıp barılmaqta. Dán hám salı ilimiy óndirislik birlespesi tárepinen bul joybar arqalı 5 gektar maydanda tamshılatıp suwǵarıw texnologiyası tiykarında salı jetistiriw tájiriybesi ótkeriledi. Joybar nátiyjesinde suwdı únemleytuǵın texnologiyalar tiykarında salı jetistiriw boyınsha qollanbaları islep shıǵıladı hám keleshekte tájiriybe maydanların keńeytiw rejelestirilgen.
Bul joybar Qaraqalpaqstanda suw resurslarınan aqılǵa muwapıq paydalanıwǵa, salı jetistiriwde jańa texnologiyalardı engiziw ge hám agrar tarawın rawajlandırıwǵa xızmet etedi.
