Qaraqalpaqstan Respublikası Awıl xojalıǵı ministrligi hám Nókis rayonı hákimliginiń baspasóz xızmetleriniń birgelikte ótkergen press-turiniń keyingi mánzili  “Qudekov Jadiger” JShJda boldı. Bul xojalıq Nókis rayonında qawın hám ǵarbız jetistiriw boyınsha aldıńǵılardan biri bolıp esaplanadı.

“Qudekov Jadiger” JShJ usı jılı 10 gektar maydanda qawın hám ǵarbız jetistirip, joqarı zúráátlilikke eristi. Fermerler bazarda óz ónimleri menen birinshilerden bolıp payda boldı. Olardıń miynetiniń nátiyjesinde zúrááttiń 100 tonnası Qazaqstan Respublikasına eksport etildi. Bul tek ǵana xojalıqtıń emes, al pútkil Qaraqalpaqstannıń ekonomikalıq rawajlanıwına qosqan úlesi desek, asıra aytqan bolmaymız.

Házirgi waqıtta atızlarda zúráát jıyımı qızǵın dawam etpekte.

Xojalıq tek ǵana qawın hám ǵarbız benen sheklenip qalmaǵan. Olar, sonday-aq, 13 gektar maydanda alma hám almurt, 7 gektarda júzim nállerin tárbiyalamaqta. Bul miyweler hár jılı Qazaqstan hám Rossiyaǵa eksport etiledi. Bul bolsa olardıń sapasın hám xalıqaralıq bazarda básekige shıdamlılıǵın kórsetedi.

Usı press-tur dawamında jurnalistler “Qudekov Jadiger” JShJnıń tabıs sırları menen jaqınnan tanıstı. Fermerler óz tájiriybeleri menen bólisti hám keleshektegi jobaların bildirdi. Bunday is-ilajlar awıl xojalıǵın rawajlandırıw, aldıńǵı tájiriybelerin keń tarqatıw hám fermerlerdi qollap-quwatlawda úlken áhmiyetke iye.