☄️ Respublikamız fermerleri ushın oqıw-seminar trening shólkemlestirildi 
2025-jıl 7-iyul kúni Ózbekstan Respublikası Prezidentiniń “Awıl xojalıǵı eginleri tuqımlarınıń sapasın bahalaw sistemasın túp-tiykarınan reformalaw ilajları haqqında”ǵı PP-109-sanlı pármanı qabıl etildi. Pármannıń mazmun-mánisin túsindiriw hám ámeliyatqa engiziw maqsetinde Qaraqalpaqstan Respublikasında jumıs alıp barıp atırǵan fermerler ushın Qaraqalpaqstan awıl xojalıǵı hám agrotexnologiya institutı imaratında oqıw-seminar trening shólkemlestirildi hám taraw qánigeleri jańa sistema haqqında tolıq maǵlıwmat berip, qatnasıwshılardıń sorawlarına juwap berdi. Jańa tártiptiń tiykarǵı tárepleri tómendegiler: 
✅ Tuqımlıqlardıń sapasın bahalaw eki basqıshta ámelge asırıladı – atızlardaǵı aprobaciya hám laboratoriya sınaqları tiykarında “egislik juwmaǵı” rásmiylestiriledi.
✅ Tuqımlıqlardı markalaw hám olarǵa QR kodlı jarlıqlar beriw tártibi engiziledi.
✅ Sanlı QR kodı hám egislik juwmaǵı bolmaǵan tuqımlıqlardı islep shıǵarıw, satıw hám import etiw 2026-jıl 1-yanvardan qadaǵan etiledi. ✅ Fermer hám xojalıqlar egilgen tuqımlıq hám ónim haqqındaǵı maǵlıwmatlardı Awıl xojalıǵı ministrliginiń málimleme sistemasına kirgizip baradı.
✅ Tuqımlıqlardıń sapasın xalıqaralıq talaplar (OECD hám ISTA) ǵa muwapıqlastırıw boyınsha ilajlar belgilendi. Seminar dawamında usı talaplar boyınsha túsinikler berilip, fermerler ózlerin qızıqtırǵan huqıqıy hám ámeliy sorawlarǵa juwap aldı. 📌 Jańa sistemanıń tiykarǵı maqseti – sapalı tuqımlar jetistiriwdi xoshametlew, eksportqa jaramlı ónimlerdiń úlesin arttırıw hám azıq-awqat qáwipsizligin támiyinlewden ibarat.
