Gúzgi súrim – kelesi mol zúrááttiń tiykarı
Ámiwdárya rayonı Aq altın awılında jaylasqan “Yakubova Gavxar” fermer xojalıǵında búgin awıl xojalıǵı tarawı ushın áhmiyetli esaplanǵan gúzgi súrim boyınsha kórgizbeli ámeliy seminar bolıp ótti.
Ilajda Qaraqalpaqstan Respublikası Ministrler Keńesiniń Baslıǵı Farhod Ermanov, Joqarǵı Keńestiń Agrar, suw xojalıǵı, tábiyattı qorǵaw hám ekologiya máseleleri komitetiniń baslıǵı Anvar Jumanazarov, Ministrler Keńesi Baslıǵınıń awıl hám suw xojalıǵı boyınsha orınbasarı Shuhrat Teshaev, qubla rayonlardıń hákimleri, respublikalıq dárejedegi juwapkerler, aldıńǵı fermerler hám ǵalaba xabar qurallarınıń wákilleri qatnastı.
Seminardı Qaraqalpaqstan Respublikası Ministrler Keńesiniń Baslıǵı Farhod Ermanov ashıp berip, usı jılǵı paxta zúráátin artıǵı menen orınlawda jankúyerlik kórsetken barlıq miynetkesh diyqan hám fermerlerge shın júrekten minnetdarshılıq bildirdi. Ol óziniń shıǵıp sóylegen sózinde jer – bul biybaha jemis ekenin, onı óz waqtında shúdigarlap, durıs tárbiyalap barılsa, joqarı zúráátliliktiń girewi ekenin ayrıqsha atap ótti. Farhod Ermanov gúzgi shúdigarlaw processlerin sapalı shólkemlestiriw, jerlerdi báhárgi eginlerge tayarlaw, suw hám texnikalıq resurslardan aqılǵa uǵras paydalanıw, topıraqtıń ónimdarlıǵın arttırıw boyınsha bir qatar wazıypalardı belgilep berdi.
Ilaj dawamında Ministrler Keńesi Baslıǵınıń awıl hám suw xojalıǵı boyınsha orınbasarı Shuhrat Teshaev shıǵıp sóylep, gúzgi súrim jumısların óz waqtında juwmaqlaw, agrotexnikalıq talaplarǵa qatań ámel etken halda orınlawdıń áhmiyetine toqtap ótti…
