Qaraqalpaqstan Respublikasında 2025-2026-jıllar qıs-báhár máwsimi ushın awıl xojalıǵı ónimlerin rezervke jıynaw máseleleri dodalandı

Respublika xalqın hám sociallıq taraw shólkemlerin tiykarǵı túrdegi awıl xojalıǵı ónimleri menen turaqlı támiyinlew, ishki tutınıw bazarına ónim jetkerip beriwdi sistemalı monitoring etiw jáne bahalardıń turaqlılıǵın saqlaw eń áhmietli wazıypalardan biri bolıp esaplanadı.

Usı maqsette, 2025-2026-jıllar qıs-báhár máwsiminde tiykarǵı túrdegi awıl xojalıǵı ónimlerin rezervke jıynaw boyınsha Qaraqalpaqstan Respublikası Ministrler Keńesiniń qararı qabıl etilgen.

Búgingi kúnde usı qararda belgilengen tapsırmalardıń orınlanıwı, ónimlerdi rezervke toplaw procesine baylanıslı tayarlaw hám sawda shólkemleri menen ónim jetistiriwshiler arasında dúzilgen kontraktaciya shártnamalarınıń orınlanıwı, sonday-aq, belgilengen kólemlerdi qarjılandırıw dárekleri boyınsha jaǵday dodalandı.

Bul máseleler Awıl xojalıǵı ministrliginiń májilisler zalında ótkerilgen májiliste kórip shıǵıldı. Májiliske Qaraqalpaqstan Respublikası Ministrler Keńesi Baslıǵınıń awıl hám suw xojalıǵı boyınsha orınbasarı Shuhrat Teshaev hám Qaraqalpaqstan Respublikası Prokurorınıń orınbasarı Bayram Nawrızbaev basshılıq etti.

Májiliste Awıl xojalıǵı ministriniń orınbasarı, kommerciyalıq banklerdiń basshıları, rayon hákimlikleriniń qarjı, ekonomika hám kámbaǵallıqtı qısqartıw máseleleri boyınsha birinshi orınbasarları, sonday-aq, rayon hákimleriniń awıl hám suw xojalıǵı boyınsha orınbasarları hám tayarlaw shólkemleriniń basshıları qatnastı.