Baq qatar aralarınan nátiyjeli paydalanıw — azıq-awqat jetistiriwdi arttırıw ámeli
Qaraqalpaqstan Respublikasında awıl xojalıǵı jerlerinen nátiyjeli paydalanıw hám de azıq-awqat ónimlerin jetistiriw kólemin arttırıw boyınsha sistemalı jumıslar alıp barılmaqta. Usı jılı rayonlarda jámi 2,5 mıń gektar baǵ qatar aralarına baǵ-palız eginlerin egiw rejelestirilgen bolıp, házirgi waqıtta bul baǵdarda agrotexnikalıq ilajlar izbe-iz dawam ettirilmekte.
Bul baslama jer resurslarınan aqılǵa muwapıq paydalanıw, ónimdarlıqtı arttırıw hám ishki bazardı jergilikli ónimler menen támiyinlewde úlken áhmiyetke iye. Ásirese, baq qatar aralarınan nátiyjeli paydalanıw arqalı qosımsha dáramat derekleri jaratılmaqta hám de fermer xojalıqlarınıń ekonomikalıq turaqlılıǵı bekkemlenbekte.
Atap aytqanda, Ámiwdárya rayonında 30 gektar baq qatar aralarına kartoshka egiw rejelestirilgen. Házirgi kúnde bul rejeler basqıshpa-basqısh ámelge asırılmaqta. Sonıń ishinde, “Doslıq” APJ aymaǵında jaylasqan “Shaykól Doslıq” fermer xojalıǵınıń 2 gektar maydanındaǵı baq qatar aralarına kartoshka egilip, agrotexnikalıq jumıslar jolǵa qoyılǵan.
Fermerler tárepinen agrotexnikalıq talaplar tiykarında suwǵarıw, tóginlew hám biygana shóplerdi joq etiw jumıslarınıń óz waqtında ámelge asırılıwı keleshekte joqarı ónim alıw ushın bekkem tiykar jaratpaqta.
Ulıwma alǵanda, aymaqlarda ámelge asırılıp atırǵan bunday jumıslar tek ǵana jer ónimdarlıǵın arttırıw emes, bálkim xalıqtı sapalı hám arzan azıq-awqat ónimleri menen támiyinlewge de xızmet etedi.
